die 17 decembris
Laeténtur caeli et exsúltet terra, quia Dóminus noster véniet, et páuperum suórum miserébitur.
Deus, humánae cónditor et redémptor natúrae, qui Verbum tuum in útero perpétuae virginitátis carnem assúmere voluísti, réspice propítius ad preces nostras, ut Unigénitus tuus, nostra humanitáte suscépta, nos divíno suo consórtio sociáre dignétur. Per Dóminum.
Léctio libri Génesis
Dixit Iacob fíliis suis :
«Congregámini et audíte, fílii Iacob, audíte Israel patrem vestrum !
Iuda, te laudábunt fratres tui ; manus tua in cervícibus inimicórum tuórum; adorábunt te fílii patris tui.
Cátulus leónis Iuda : a praeda, fili mi, ascendísti ; requiéscens accúbuit ut leo et quasi leaéna ; quis suscitábit eum ?
Non auferétur sceptrum de Iuda et báculus ducis de pédibus eius, donec véniat ille, cuius est, et cui erit oboediéntia géntium».
Psalmus
Deus, iudícium tuum regi da, et iustítiam tuam fílio regis ;
Iúdicet pópulum tuum in iustítia et páuperes tuos in iudício.
Afferant montes pacem pópulo, et colles iustítiam.
Iudicábit páuperes pópuli et salvos fáciet fílios ínopis et humiliábit calumniatórem.
Florébit in diébus eius iustítia et abundántia pacis, donec auferátur luna.
Et dominábitur a mari usque ad mare et a Flúmine usque ad términos orbis terrárum.
Sit nomen eius benedíctum in saécula, ante solem permanébit nomen eius.
Et benedicéntur in ipso omnes tribus terrae, omnes gentes magnificábunt eum.
Allelúia, allelúia.
Sapiéntia Altíssimi, fórtiter suavitérque dispónens ómnia : veni ad docéndum nos viam prudéntiae.
Allelúia.
Léctio sancti Evangélii secundum Matthaéum
Liber generatiónis Iesu Christi fílii David fílii Abraham.
Abraham génuit Isaac, Isaac autem génuit Iacob, Iacob autem génuit Iudam et fratres eius, Iudas autem génuit Phares et Zara de Thamar, Phares autem génuit Esrom, Esrom autem génuit Aram, Aram autem génuit Amínadab, Amínadab autem génuit Naásson, Naásson autem génuit Salmon, Salmon autem génuit Booz de Rahab, Booz autem génuit Obed ex Ruth, Obed autem génuit Iesse, Iesse autem génuit David regem.
David autem rex génuit Salomónem ex ea, quae fuit Uríae, Sálomon autem génuit Róboam, Róboam autem génuit Abíam, Abías autem génuit Asa, Asa autem génuit Iósaphat, Iósaphat autem génuit Ioram, Ioram autem génuit Ozíam, Ozías autem génuit Ióatham, Ióatham autem génuit Achaz, Achaz autem génuit Ezechíam, Ezechías autem génuit Manássen, Manásses autem génuit Amon, Amon autem génuit Iosíam, Iosías autem génuit Iechoníam et fratres eius in transmigratióne Babylónis.
Et post transmigratiónem Babylónis, Iechonías génuit Saláthiel, Saláthiel autem génuit Zoróbabel, Zoróbabel autem génuit Abiud, Abiud autem génuit Elíachim, Elíachim autem génuit Azor, Azor autem génuit Sadoc, Sadoc autem génuit Achim, Achim autem génuit Eliud, Eliud autem génuit Eleázar, Eleázar autem génuit Matthan, Matthan autem génuit Iacob, Iacob autem génuit Ioseph, virum Maríae, de qua natus est Iesus, qui vocátur Christus.
Omnes ergo generatiónes ab Abraham usque ad David generatiónes quattuórdecim ; et a David usque ad transmigratiónem Babylónis generatiónes quattuórdecim ; et a transmigratióne Babylónis usque ad Christum generatiónes quattuórdecim.
Ecclésiae tuae, Dómine, dona sanctífica, et concéde ut, per haec veneránda mystéria, pane caelésti réfici mereámur. Per Christum.
Vere dignum et iustum est, aéquum et salutáre, nos tibi semper et ubíque grátias ágere : Dómine, sancte Pater, omnípotens aetérne Deus : per Christum Dóminum nostrum.
Quem praedixérunt cunctórum praecónia prophetárum, Virgo Mater ineffábili dilectióne sustínuit, Ioánnes cécinit affutúrum et adésse monstrávit. Qui suae nativitátis mystérium tríbuit nos praeveníre gaudéntes, ut et in oratióne pervígiles et in suis invéniat láudibus exsultántes.
Et ídeo cum Angelis et Archángelis, cum Thronis et Dominatiónibus, cumque omni milítia caeléstis exércitus, hymnum glóriae tuae cánimus, sine fine dicéntes :
Sanctus…
- Ecce véniet desiderátus cunctis géntibus, et replébitur glória domus Dómini.
Divíno múnere satiáti, quaésumus, omnípotens Deus, hoc desidério potiámur, ut, a tuo accénsi Spíritu, ante conspéctum veniéntis Christi tui, velut clara luminária fulgeámus. Per Christum.
die 18 decembris
Rex noster advéniet Christus, quem Ioánnes praedicávit Agnum esse ventúrum.
Concéde, quaésumus, omnípotens Deus, ut, qui sub peccáti iugo ex vetústa servitúte deprímimur, exspectáta Unigéniti tui nova nativitáte liberémur. Per Dóminum.
Léctio libri Ieremíae prophétae
«Ecce dies véniunt, dicit Dóminus, et suscitábo David germen iustum ; et regnábit rex et sápiens erit et fáciet iudícium et iustítiam in terra.
In diébus illis salvábitur Iuda, et Israel habitábit confidénter ; et hoc est nomen, quod vocábunt eum : Dóminus iustítia nostra. Propter hoc ecce dies véniunt, dicit Dóminus, et non dicent ultra : “Vivit Dóminus, qui edúxit fílios Israel de terra Aegýpti !”, sed : “Vivit Dóminus, qui edúxit et addúxit semen domus Israel de terra aquilónis et de cunctis terris !”, ad quas eiéceram eos ; et habitábunt in terra sua».
Psalmus
Deus, iudícium tuum regi da, et iustítiam tuam fílio regis ;
Iúdicet pópulum tuum in iustítia et páuperes tuos in iudício.
Quia liberábit ínopem clamántem et páuperem, cui non erat adiútor.
Parcet páuperi et ínopi et ánimas páuperum salvas fáciet.
Benedíctus Dóminus Deus, Deus Israel, qui facit mirabília solus.
Et benedíctum nomen maiestátis eius in aetérnum ; et replébitur maiestáte eius omnis terra. Fiat, fiat.
Allelúia, allelúia.
Dux domus Israel, qui Móysi in Sina legem dedísti : veni ad rediméndum nos in bráchio exténto.
Allelúia.
Léctio sancti Evangélii secundum Matthaéum
Iesu Christi generátio sic erat. Cum esset desponsáta mater eius María Ioseph, ántequam convenírent invénta est in útero habens de Spíritu Sancto. Ioseph autem vir eius, cum esset iustus et nollet eam tradúcere, vóluit occúlte dimíttere eam.
Haec autem eo cogitánte, ecce ángelus Dómini in somnis appáruit ei dicens :
«Ioseph fili David, noli timére accípere Maríam cóniugem tuam. Quod enim in ea natum est, de Spíritu Sancto est ; páriet autem fílium, et vocábis nomen eius Iesum ; ipse enim salvum fáciet pópulum suum a peccátis eórum».
Hoc autem totum factum est, ut adimplerétur id, quod dictum est a Dómino per prophétam dicéntem : «Ecce, virgo in útero habébit et páriet fílium, et vocábunt nomen eius Emmánuel», quod est interpretátum Nobíscum-Deus.
Exsúrgens autem Ioseph a somno fecit, sicut praecépit ei ágelus Dómini, et accépit cóniugem suam.
Sacrifícium tibi, Dómine, celebrándum tuo nómini nos reddat accéptos, ut ipsíus aeternitátis mereámur esse consórtes, qui mortalitátem nostram sua mortalitáte curávit. Per Christum.
Vere dignum et iustum est, aéquum et salutáre, nos tibi semper et ubíque grátias ágere : Dómine, sancte Pater, omnípotens aetérne Deus : per Christum Dóminum nostrum.
Quem praedixérunt cunctórum praecónia prophetárum, Virgo Mater ineffábili dilectióne sustínuit, Ioánnes cécinit affutúrum et adésse monstrávit. Qui suae nativitátis mystérium tríbuit nos praeveníre gaudéntes, ut et in oratióne pervígiles et in suis invéniat láudibus exsultántes.
Et ídeo cum Angelis et Archángelis, cum Thronis et Dominatiónibus, cumque omni milítia caeléstis exércitus, hymnum glóriae tuae cánimus, sine fine dicéntes :
Sanctus…
- Vocábunt nomen eius Emmánuel, quod est interpretátum Nobíscum-Deus.
Suscipiámus, Dómine, misericórdiam tuam in médio templi tui, et redemptiónis nostrae ventúra sollémnia cóngruis honóribus praecedámus. Per Christum.
die 19 decembris
Qui ventúrus est véniet et non tardábit, et iam non erit timor in fínibus nostris, quóniam ipse est Salvátor noster.
Deus, qui splendórem glóriae tuae per sacrae Vírginis partum mundo dignátus es reveláre, tríbue, quaésumus, ut tantae incarnatiónis mystérium et fídei integritáte colámus, et dovóto semper obséquio frequentémus. Per Dóminum.
Léctio libri Iúdicum
Erat vir quidam de Sáraa et de stirpe Dan nómine Mánue habens uxórem sterílem. Cui appáruit ángelus Domini et dixit ad eam :
«Ecce sterílis es et absque líberis, sed concípies et páries fílium. Cave ergo, ne vinum bibas ac síceram nec immúndum quidquam cómedas, quia ecce concípies et páries fílium, cuius non tanget caput novácula : erit enim puer nazaraéus Dei ex matris útero et ipse incípiet liberáre Israel de manu Philisthinórum».
Quae cum venísset ad marítum, dixit ei : «Vir Dei venit ad me habens aspéctum sicut ángelus Dómini, terríbilis nimis. Non interrogávi eum, unde esset, nec ipse nomen suum mihi indicávit. Et dixit mihi : “Ecce concípies et páries fílium ; cave, ne vinum bibas et síceram et ne áliquo vescáris immúndo : erit enim puer nazaraéus Dei ex útero matris usque ad diem mortis suae”».
Péperit ítaque fílium et vocávit nomen eius Samson. Crevítque puer, et benedíxit ei Dóminus. Coepítque spíritus Dómini impéllere eum in Castris Dan inter Sáraa et Esthaol.
Psalmus
Esto mihi in rupem praesídii et in domum munítam, ut salvum me fácias,
Quóniam fortitúdo mea et refúgium meum es tu.
Deus meus, éripe me de manu peccatóris.
Quóniam tu es exspectátio mea, Dómine ; Dómine, spes mea a iuventúte mea.
Super te inníxus sum ex útero, de ventre matris meae tu es suscéptor meus ; in te laus mea semper.
Véniam ad poténtias Dómini ; Dómine, memorábor iustítiae tuae solíus.
Deus, docuísti me a iuventúte mea ; et usque nunc annuntiábo mirabília tua.
Allelúia, allelúia.
Radix Iesse, stans in signum populórum : veni ad liberándum nos, iam noli tardáre.
Allelúia.
Léctio sancti Evangélii secúndum Lucam
Fuit in diébus Heródis, regis Iudaéae, sacérdos quidam nómine Zacharías de vice Abíae et uxor illi de filiábus Aaron, et nomen eius Elísabeth. Erant autem iusti ambo ante Deum, incedéntes in ómnibus mandátis et iustificatiónibus Dómini, irreprehensíbiles. Et non erat illis fílius eo quod esset Elísabeth stérilis, et ambo processíssent in diébus suis.
Factum est autem cum sacerdótio fungerétur in órdine vicis suae ante Deum, secúndum consuetúdinem sacerdótii sorte éxiit, ut incénsum póneret ingréssus in templum Dómini ; et omnis multitúdo erat pópuli orans foris hora incénsi. Appáruit autem illi ángelus Dómini stans a dextris altáris incénsi ; et Zacharías turbátus est videns, et timor írruit super eum.
Ait autem ad illum ángelus :
«Ne tímeas, Zacharía, quóniam exaudíta est deprecátio tua, et uxor tua Elísabeth páriet tibi filiium, et vocábis nomen eius Ioánnem. Et erit gáudium tibi et exsultátio, et multi in nativitáte eius gaudébunt : erit enim magnus coram Dómino et vinum et síceram non bibet et Spíritu Sancto replébitur adhuc ex útero matris suae et multos filiórum Israel convértet ad Dóminum Deum ipsórum. Et ipse praecédet ante illum in spíritu et virtúte Elíae, ut convértat corda patrum in fílios et incredíbiles ad prudéntiam iustórum, paráre Dómino plebem perféctam».
Et dixit Zacharías ad ángelum : «Unde hoc sciam ? Ego enim sum senex et uxor mea procéssit in diébus suis». Et respóndens ángelus dixit ei :
«Ego sum Gábriel, qui adsto ante Deum et missus sum loqui ad te et haec tibi evangelizáre. Et ecce : eris tacens et non póteris loqui usque in diem, quo haec fiant, pro eo quod non credidísti verbis meis, quae implebúntur in témpore suo».
Et erat plebs exspéctans Zacharíam, et mirabántur quod tardáret ipse in templo. Egréssus autem non póterat loqui ad illos, et cognovérunt quod visiónem vidísset in templo ; et ipse erat ínnuens illis et permánsit mutus.
Et factum est ut impléti sunt dies offícii eius, ábiit in domum suam. Post hos autem dies concépit Elísabeth uxor eius et occultábat se ménsibus quinque dicens : «Sic mihi fecit Dóminus in diébus, quibus respéxit auférre oppróbrium meum inter hómines».
Propítius intuére múnera, Dómine, quaésumus, quae tuis altáribus exhibémus, ut, quod nostra fragilitáte defértur, tua virtúte sacrétur. Per Christum.
Vere dignum et iustum est, aéquum et salutáre, nos tibi semper et ubíque grátias ágere : Dómine, sancte Pater, omnípotens aetérne Deus : per Christum Dóminum nostrum.
Quem praedixérunt cunctórum praecónia prophetárum, Virgo Mater ineffábili dilectióne sustínuit, Ioánnes cécinit affutúrum et adésse monstrávit. Qui suae nativitátis mystérium tríbuit nos praeveníre gaudéntes, ut et in oratióne pervígiles et in suis invéniat láudibus exsultántes.
Et ídeo cum Angelis et Archángelis, cum Thronis et Dominatiónibus, cumque omni milítia caeléstis exércitus, hymnum glóriae tuae cánimus, sine fine dicéntes :
Sanctus…
- Visitábit nos Oriens ex alto, ad dirigéndos pedes nostros in viam pacis.
Grátias de collátis munéribus referéntes, fac nos propítius, omnípotens Deus, quae ventúra sunt desideráre praestánda, ut nativitátem Salvátoris nostri purificátis suscipiámus méntibus honorándam. Per Christum.
die 20 decembris
Egrediétur virga de radíce Iesse, et replébitur omnis terra glória Dómini, et vidébit omnis caro salutáre Dei.
Deus, cuius ineffábile Verbum, Angelo nuntiánte, Virgo immaculáta suscépit, et, domus divínitátis effécta, Sancti Spíritus luce replétur, quaésumus, ut nos eius exémplo, voluntáti tuae humíliter adhaerére valeámus. Per Dóminum.
Léctio libri Isaíae prophétae
Adiécit Dóminus loqui ad Achaz dicens :
«Pete tibi signum a Dómino Deo tuo in profúndum inférni sive in excélsum supra».
Et dixit Achaz : «Non petam et non tentábo Dóminum».
Et dixit :
«Audíte ergo, domus David ; numquid parum vobis est moléstos esse homínibus, quia molésti estis et Deo meo ? Propter hoc dabit Dóminus ipse vobis signum. Ecce, virgo concípiet et páriet fílium et vocábit nomen eius Emmanuel».
Psalmus
Dómini est terra et plenitúdo eius, orbis terrárum et qui hábitant in eo.
Quia ipse super mária fundávit eum et super flúmina firmávit eum.
Quis ascéndet in montem Dómini, aut quis stabit in loco sancto eius ?
Innocens mánibus et mundo corde, qui non levávit ad vana ánimam suam, nec iurávit in dolum.
Hic accípiet benedictiónem a Dómino et iustificatiónem a Deo salutári suo.
Haec est generátio quaeréntium eum, quaeréntium fáciem Dei Iacob.
Allelúia, allelúia.
Clavis David, qui áperis portas aetérni regni : veni et educ vinctum de domo cárceris sedéntem in ténebris.
Allelúia.
Léctio sancti Evangélii secundum Lucam
Missus est ángelus Gabriel a Deo in civitátem Galilaéae, cui nomen Názareth, ad vírginem desponsátam viro, cui nomen erat Ioseph de domo David, et nomen vírginis María.
Et ingréssus ad eam dixit :
«Ave, grátia plena, Dóminus tecum».
Ipsa autem turbáta est in sermóne eius et cogitábat qualis esset ista salutátio.
Et ait ángelus ei :
«Ne tímeas, María ; invenísti enim grátiam apud Deum. Et ecce concípies in útero et páries fílium, et vocábis nomen eius Iesum. Hic erit magnus et Fílius Altíssimi vocábitur, et dabit illi Dóminus Deus sedem David patris eius, et regnábit super domum Iacob in aetérnum, et regni eius non erit finis».
Dixit autem María ad ángelum : «Quómodo fiet istud, quóniam virum non cognósco ?».
Et respóndens ángelus dixit ei :
«Spíritus Sanctus supervéniet in te, et virtus Altíssimi obumbrábit tibi : ideóque et quod nascétur sanctum, vocábitur Fílius Dei. Et ecce Elísabeth cognáta tua et ipsa concépit fílium in senécta sua, et hic mensis est sextus illi, quae vocátur stérilis, quia non erit impossíbile apud Deum omne verbum».
Dixit autem María :
«Ecce ancílla Dómini ; fiat mihi secúndum verbum tuum».
Et discéssit ab illa ángelus.
Inténde, quaésumus, Dómine, sacrifícium singuláre, ut, huius participatióne mystérii, quae speránda crédimus, exspectáta sumámus. Per Christum.
Vere dignum et iustum est, aéquum et salutáre, nos tibi semper et ubíque grátias ágere : Dómine, sancte Pater, omnípotens aetérne Deus : per Christum Dóminum nostrum.
Quem praedixérunt cunctórum praecónia prophetárum, Virgo Mater ineffábili dilectióne sustínuit, Ioánnes cécinit affutúrum et adésse monstrávit. Qui suae nativitátis mystérium tríbuit nos praeveníre gaudéntes, ut et in oratióne pervígiles et in suis invéniat láudibus exsultántes.
Et ídeo cum Angelis et Archángelis, cum Thronis et Dominatiónibus, cumque omni milítia caeléstis exércitus, hymnum glóriae tuae cánimus, sine fine dicéntes :
Sanctus…
- Dixit Angelus ad Maríam : Ecce concípies et páries fílium, et vocábis nomen eius Iesum.
Quos múnere caelésti réficis, Dómine, divíno tuére praesídio, ut, tuis mystériis perfruéntes, in vera fácias pace gaudére. Per Christum.
die 21 decembris
Modo véniet Dominátor Dóminus, et vocábitur nomen eius Emmánuel, quia Nobíscum-Deus.
Preces pópuli tui, quaésumus, Dómine, cleménter exáudi, ut, qui de Unigéniti tui in nostra carne advéntu laetántur, cum vénerit in sua maiestáte, aetérnae vitae praémium consequántur. Per Dóminum.
ad libitum
Léctio Cántici Canticórum
Vox dilécti mei !
Ecce iste venit sáliens in móntibus, transíliens colles. Símilis est diléctus meus capréae hinnulóque cervórum.
En ipse stat post paríetem nostrum respíciens per fenéstras, prospíciens per cancéllos.
En diléctus meus lóquitur mihi : «Surge, amíca mea, colúmba mea, formósa mea, et veni.
Iam enim hiems tránsiit, imber abiit et recéssit. Flores apparuérunt in terra, tempus putatiónis advénit ; vox túrturis audíta est in terra nostra, ficus prótulit grossos suos, víneae floréntes dedérunt odórem suum : surge, amíca mea, speciósa mea, et veni, colúmba mea, in foramínibus petrae, in cavérna abrúpta.
Osténde mihi fáciem tuam, sonet vox tua in áuribus meis ; vox enim tua dulcis, et fácies tua decóra».
Léctio libri Sophoníae prophétae
Lauda, fília Sion ; iubiláte, Israel ! Laetáre et exsúlta in omni corde, fília Ierúsalem !
Abstulit Dóminus iudícium tuum, avértit inimícos tuos ; rex Israel Dóminus in médio tui, non timébis malum ultra. In die illa dicétur Ierúsalem : «Noli timére, Sion ; ne dissolvántur manus tuae !
Dóminus Deus tuus in médio tui, fortis ipse salvábit ; gaudébit super te in laetítia, commótus in dilectióne sua ; exsultábit super te in laude».
Psalmus
Confitémini Dómino in cíthara, in psaltério decem chordárum psállite illi.
Cantáte ei cánticum novum, bene psállite ei in vociferatióne.
Consílium autem Dómini in aetérnum manet, cogitatiónes cordis eius in generatióne et generatiónem.
Beáta gens, cui Dóminus est Deus, pópulus, quem elégit in hereditátem sibi.
Anima nostra sústinet Dóminum, quóniam adiútor et protéctor noster est ;
Quia in eo laetábitur cor nostrum, et in nómine sancto eius sperávimus.
Allelúia, allelúia.
Emmánuel, rex et légifer noster : veni ad salvándum nos, Dómine Deus noster.
Allelúia.
Léctio sancti Evangélii secundum Lucam
Exsúrgens María in diébus illis ábiit in montána cum festinatióne in civitátem Iudae et intrávit in domum Zacharíae et salutávit Elísabeth.
Et factum est ut audívit salutatiónem Maríae Elísabeth, exsultávit infans in útero eius, et repléta est Spíritu Sancto Elísabeth et exclamávit voce magna et dixit :
«Benedícta tu inter mulíeres, et benedíctus fructus ventris tui.
Et unde hoc mihi, ut véniat mater Dómini mei ad me ? Ecce enim ut facta est vox salutatiónis tuae in áuribus meis, exsultávit in gáudio infans in útero meo.
Et beáta, quae crédidit, quóniam perficiéntur ea, quae dicta sunt ei a Dómino».
Ecclésiae tuae, Dómine, múnera placátus assúme, quae et miséricors offerénda tribuísti, et in nostrae salútis poténter éfficis transíre mystérium. Per Christum.
Vere dignum et iustum est, aéquum et salutáre, nos tibi semper et ubíque grátias ágere : Dómine, sancte Pater, omnípotens aetérne Deus : per Christum Dóminum nostrum.
Quem praedixérunt cunctórum praecónia prophetárum, Virgo Mater ineffábili dilectióne sustínuit, Ioánnes cécinit affutúrum et adésse monstrávit. Qui suae nativitátis mystérium tríbuit nos praeveníre gaudéntes, ut et in oratióne pervígiles et in suis invéniat láudibus exsultántes.
Et ídeo cum Angelis et Archángelis, cum Thronis et Dominatiónibus, cumque omni milítia caeléstis exércitus, hymnum glóriae tuae cánimus, sine fine dicéntes :
Sanctus…
- Beáta quae credidísti, quóniam perficiéntur ea quae dicta sunt tibi a Dómino.
Sit plebi tuae, Dómine, continuáta defénsio divíni participátio mystérii, ut, maiestáti tuae plena devotióne subiécta, salvatiónem mentis et córporis affluénter accípiat. Per Christum.
die 22 decembris
Attóllite, portae, cápita vestra, et elevámini, portae aeternáles, et introíbit rex glóriae.
Deus, qui, hóminem delápsum in mortem conspíciens, Unigéniti tui advéntu redímere voluísti, praesta, quaésumus, ut qui húmili eius incarnatiónem devotióne faténtur, ipsíus étiam Redemptóris consórtia mereántur. Per Dóminum.
Léctio libri prióris Samuélis
Anna addúxit púerum secum, postquam ablactáverat, cum vítulo trium annórum et tribus módiis farínae et utre vini ; et addúxit eum ad domum Dómini in Silo. Puer autem erat adhuc infántulus.
Et immolavérunt vítulum et obtulérunt púerum Heli, et ait Anna : «Obsecro, mi dómine ; vivit ánima tua, dómine, ego sum illa múlier, quae steti coram te hic orans Dóminum. Pro púero isto orávi, et dedit mihi Dóminus petitiónem meam, quam postulávi eum. Idcírco et ego commodávi eum Dómino ; cunctis diébus, quibus vivet, postulátus erit pro Dómino».
Et adoravérunt ibi Dóminum.
Canticum
Exsultávit cor meum in Dómino, exaltátum est cornu meum in Deo meo ;
Dilatátum est os meum super inimícos meos, quóniam laetáta sum in salutári tuo.
Arcus fórtium confráctus est, et infírmi accíncti sunt róbore.
Saturáti prius pro pane se locavérunt, et famélici non eguérunt ámplius.
Stérilis péperit plúrimos, et, quae multos habébat fílios, emárcuit.
Dóminus mortíficat et vivíficat, dedúcit ad inférnum et redúcit.
Dóminus páuperem facit et ditat, humíliat et súblevat ;
Súscitat de púlvere egénum et de stércore élevat páuperem,
Ut sédeat cum princípibus et sólium glóriae téneat.
Allelúia, allelúia.
Rex géntium et lapís anguláris Ecclésiae : veni et salva hóminem, quem de limo formásti.
Allelúia.
Léctio sancti Evangélii secundum Lucam
Ait María :
«Magníficat ánima mea Dóminum,
Et exsultávit spíritus meus in Deo salvatóre meo, quia respéxit humilitátem ancíllae suae.
Ecce enim ex hoc beátam me dicent omnes generatiónes, quia fecit mihi magna, qui potens est, et sanctum nomen eius,
Et misericórdia eius in progénies et progénies timéntibus eum.
Fecit poténtiam in bráchio suo, dispérsit supérbos ménte cordis sui,
Depósuit poténtes de sede et exaltávit húmiles ;
Esuriéntes implévit bonis et dívites dimísit inánes.
Suscépit Israel púerum suum, recordátus misericórdiae,
Sicut locútus est ad patres nostros, Abraham et sémini eius in saécula».
Mansit autem María cum Elísabeth quasi ménsibus tribus et revérsa est in domum suam.
In tua pietáte confidéntes, Dómine, cum munéribus ad altária veneránda concúrrimus, ut, tua purificánte nos grátia, iísdem quibus famulámur mystériis emundémur. Per Christum.
Vere dignum et iustum est, aéquum et salutáre, nos tibi semper et ubíque grátias ágere : Dómine, sancte Pater, omnípotens aetérne Deus : per Christum Dóminum nostrum.
Quem praedixérunt cunctórum praecónia prophetárum, Virgo Mater ineffábili dilectióne sustínuit, Ioánnes cécinit affutúrum et adésse monstrávit. Qui suae nativitátis mystérium tríbuit nos praeveníre gaudéntes, ut et in oratióne pervígiles et in suis invéniat láudibus exsultántes.
Et ídeo cum Angelis et Archángelis, cum Thronis et Dominatiónibus, cumque omni milítia caeléstis exércitus, hymnum glóriae tuae cánimus, sine fine dicéntes :
Sanctus…
- Magníficat ánima mea Dóminum, quia fecit mihi magna, qui potens est.
Róboret nos, Dómine, tui sacraménti percéptio, ut veniénti Salvatóri mereámur cum dignis opéribus obviáre, et beatitúdinis praémia promeréri. Per Christum.
die 23 decembris
Nascétur nobis párvulus, et vocábitur Deus, Fortis ; in ipso benedicéntur omnes tribus terrae.
Omnípotens sempitérne Deus, nativitátem Fílii tui secúndum carnem propinquáre cernéntes, quaésumus, ut nobis indígnis fámulis tuis misericórdiam praestet Verbum, quod ex Vírgine María dignátum est caro fíeri, et habitáre in nobis. Qui tecum.
Léctio libri Malachíae prophétae
Ecce ego mittam ángelum meum, et praeparábit viam ante fáciem meam ; et statim véniet ad templum suum Dominátor, quem vos quaéritis, et ángelus testaménti, quem vos vultis. Ecce venit, dicit Dóminus exercítuum ; et quis póterit sustinére diem advéntus eius, et quis stabit, cum apparébit ?
Ipse enim quasi ignis conflans et quasi herba fullónum ; et sedébit conflans et emúndans argéntum et purgábit fílios Levi et colábit eos quasi aurum et quasi argéntum, et erunt Dómino offeréntes sacrifícia in iustítia. Et placébit Dómino sacrifícium Iudae et Ierúsalem sicut diébus prístinis et sicut annis antíquis.
Ecce ego mittam vobis Elíam prophétam, ántequam véniat dies Dómini magnus et horríbilis ; et convértet cor patrum ad fílios et cor filiórum ad patres eórum, ne véniam et percútiam terram anathémate.
Psalmus
Vias tuas, Dómine, demónstra mihi et sémitas tuas édoce me.
Dírige me in veritáte tua et doce me, quia tu es Deus salútis meae, et te sustínui tota die.
Dulcis et rectus Dóminus, propter hoc peccatóres viam docébit ;
Díriget mansuétos in iudício, docébit mites vias suas.
Univérsae viae Dómini misericórdia et véritas custodiéntibus testaméntum eius et testimónia eius.
Familiáriter aget Dóminus cum timéntibus eum, ut testaméntum suum maniféstet illis.
Allelúia, allelúia.
Rex géntium et lapís anguláris Ecclésiae : veni et salva hóminem, quem de limo formásti.
Allelúia.
Léctio sancti Evangélii secundum Lucam
Elísabeth implétum est tempus pariéndi, et péperit fílium. Et audiérunt vicíni et cognáti eius quia magnificávit Dóminus misericórdiam suam cum illa, et congratulabántur ei. Et factum est in die octávo venérunt circumcídere púerum et vocábant eum nómine patris sui Zacharíam.
Et respóndens mater eius dixit : «Nequáquam, sed vocábitur Ioánnes».
Et dixérunt ad illam : «Nemo est in cognatióne tua, qui vocétur hoc nómine». Innuébant autem patri eius quem vellet vocári eum.
Et póstulans pugillárem scripsit dicens : «Ioánnes est nomen eius». Et miráti sunt univérsi. Apértum est autem ílico os eius et lingua eius, et loquebátur benedícens Deum. Et factus est timor super omnes vicínos eórum, et super ómnia montána Iudaéae divulgabántur ómnia verba haec. Et posuérunt omnes, qui audíerant, in corde suo dicéntes : «Quis putas puer iste erit ?». Etenim manus Dómini erat cum illo.
Haec oblátio, qua divíni cultus nobis est índita plenitúdo, sit tibi, Dómine, perfécta placátio, ut nostri Redemptóris exórdia purificátis méntibus celebrémus. Per Christum.
Vere dignum et iustum est, aéquum et salutáre, nos tibi semper et ubíque grátias ágere : Dómine, sancte Pater, omnípotens aetérne Deus : per Christum Dóminum nostrum.
Quem praedixérunt cunctórum praecónia prophetárum, Virgo Mater ineffábili dilectióne sustínuit, Ioánnes cécinit affutúrum et adésse monstrávit. Qui suae nativitátis mystérium tríbuit nos praeveníre gaudéntes, ut et in oratióne pervígiles et in suis invéniat láudibus exsultántes.
Et ídeo cum Angelis et Archángelis, cum Thronis et Dominatiónibus, cumque omni milítia caeléstis exércitus, hymnum glóriae tuae cánimus, sine fine dicéntes :
Sanctus…
- Ecce sto ad óstium et pulso : si quis audíerit vocem meam, et aperúerit mihi iánuam, intrábo ad illum, et cenábo cum illo, et ipse mecum.
Caelésti múnere satiátis, Dómine, pacem tuam propitiátus indúlge, ut Fílio tuo dilectíssimo veniénti accénsis lampádibus digni praestolémur occúrsum. Per Christum.
die 24 decembris
Ecce iam venit plenitúdo témporis, in quo misit Deus Fílium suum in terram.
Festína, quaésumus, ne tardáveris, Dómine Iesu, ut advéntus tui consolatiónibus sublevéntur, qui in tua pietáte confídunt. Qui vivis.
Léctio libri alteríus Samuélis
Factum est cum sedísset rex in domo sua, et Dóminus dedísset ei réquiem úndique ab univérsis inimícis suis, dixit ad Nathan prophétam : «Vidésne quod ego hábitem in domo cedrína, et arca Dei posíta sit in médio péllium ?». Dixítque Nathan ad regem : «Omne, quod est in corde tuo, vade, fac, quia Dóminus tecum est».
Factum est autem in nocte illa, et ecce sermo Dómini ad Nathan dicens :
«Vade et lóquere ad servum meum David :
Haec dicit Dóminus :
Numquid tu aedificábis mihi domum ad habitándum ?
Ego tuli te de páscuis sequéntem greges, ut esses dux super pópulum meum Israel, et fui tecum in ómnibus, ubicúmque ambulásti, et interféci univérsos inimícos tuos a fácie tua ; fecíque tibi nomen grande iuxta nomen magnórum, qui sunt in terra.
Et ponam locum pópulo meo Israel et plantábo eum, et habitábit in eo et non turbábitur ámplius ; nec addent fílii iniquitátis ut afflígant eum sicut prius et ex die, qua constítui iúdices super pópulum meum Israel, et réquiem dabo tibi ab ómnibus inimícis tuis.
Praedicítque tibi Dóminus quod domum fáciat tibi Dóminus. Cumque compléti fúerint dies tui, et dormíeris cum pátribus tuis, suscitábo semen tuum post te, quod egrediétur de viscéribus tuis ; et firmábo regnum eius.
Ego ero ei in patrem, et ipse erit mihi in fílium. Et stábilis erit domus tua et regnum tuum usque in aetérnum ante fáciem meam, et thronus tuus erit firmus iúgiter».
Psalmus
Misericórdias Dómini in aetérnum cantábo, in generatiónem et generatiónem annuntiábo veritátem tuam in ore meo.
Quóniam dixísti : «In aetérnum misericórdia aedificábitur», in caelis firmábitur véritas tua.
«Dispósui testaméntum elécto meo, iurávi David servo meo :
Usque in aetérnum confirmábo semen tuum et aedificábo in generatiónem et generatiónem sedem tuam».
Ipse invocábit me : “Pater meus es tu, Deus meus et refúgium salútis meae”.
In aetérnum servábo illi misericórdiam meam et testaméntum meum fidéle ipsi.
Allelúia, allelúia.
Oriens, splendor lucis aetérnae et sol iustítiae : veni, et illúmina sedéntes in ténebris et umbra mortis.
Allelúia.
Léctio sancti Evangélii secundum Lucam
Zacharías implétus est Spíritu Sancto et prophetávit dicens :
«Benedíctus Dóminus, Deus Israel, quia visitávit et fecit redemptiónem plebi suae
Et eréxit cornu salútis nobis in domo David púeri sui,
Sicut locútus est per os sanctórum, qui a saéculo sunt, prophetárum eius,
Salútem ex inimícis nostris et de manu ómnium, qui odérunt nos ;
Ad faciéndam misericórdiam cum pátribus nostris et memorári testaménti sui sancti,
Iusiurándum, quod iurávit ad Abraham patrem nostrum, datúrum se nobis,
Ut sine timóre, de manu inimicórum liberáti, serviámus illi
In sanctitáte et iustítia coram ipso ómnibus diébus nostris.
Et tu, puer, prophéta Altíssimi vocáberis : praeíbis enim ante fáciem Dómini paráre vias eius,
Ad dandam sciéntiam salútis plebi eius in remissiónem peccatórum eórum,
Per víscera misericórdiae Dei nostri, in quibus visitábit nos óriens ex alto,
Illumináre his, qui in ténebris et in umbra mortis sedent, ad dirigéndos pedes nostros in viam pacis».
Puer autem crescébat et confortabátur spíritu et erat in desérto usque in diem ostensiónis suae ad Israel.
Obláta tibi, Dómine, múnera benígnus assúme, ut eórum perceptióne expiémur a peccátis, et advéntus Fílii tui glóriam puris mereámur méntibus praestolári. Per Christum.
Vere dignum et iustum est, aéquum et salutáre, nos tibi semper et ubíque grátias ágere : Dómine, sancte Pater, omnípotens aetérne Deus : per Christum Dóminum nostrum.
Quem praedixérunt cunctórum praecónia prophetárum, Virgo Mater ineffábili dilectióne sustínuit, Ioánnes cécinit affutúrum et adésse monstrávit. Qui suae nativitátis mystérium tríbuit nos praeveníre gaudéntes, ut et in oratióne pervígiles et in suis invéniat láudibus exsultántes.
Et ídeo cum Angelis et Archángelis, cum Thronis et Dominatiónibus, cumque omni milítia caeléstis exércitus, hymnum glóriae tuae cánimus, sine fine dicéntes :
Sanctus…
- Benedíctus Dóminus Deus Israel, quia visitávit et fecit redemptiónem plebi suae.
Da nobis, Dómine, hoc dono tuo mirábili recreátis, ut, sicut adoránda Fílii tui natalícia praevénimus, sic eius múnera capiámus sempitérna gaudéntes. Per Christum.