Dominica VIII per annum
Factus est Dóminus protéctor meus, et edúxit me in latitúdinem, salvum me fecit, quóniam vóluit me.
Da nobis, quaésumus, Dómine, ut et mundi cursus pacífico nobis tuo órdine dirigátur, et Ecclésia tua tranquílla devotióne laetétur. Per Dóminum.
Lectio libri Isaíae prophétae
Dixit Sion : «Derelíquit me Dóminus, et Dóminus oblítus est mei».
Numquid oblivísci potest múlier infántem suum, ut non misereátur fílio úteri sui ? Et si illa oblíta fúerit, ego tamen non oblivíscar tui.
Psalmus
In Deo tantum quiésce, ánima mea, ab ipso enim salutáre meum.
Verúmtamen ipse refúgium meum et salutáre meum, praesídium meum, non movébor ámplius.
In Deo tantum quiésce, ánima mea, quóniam ab ipso patiéntia mea.
Verúmtamen ipse Deus meus et salutáre meum, praesídium meum, non movébor.
In Deo salutáre meum et glória mea ; Deus fortitúdinis meae, et refúgium meum in Deo est.
Speráte in eo, omnis congregátio pópuli, effúndite coram illo corda vestra ; Deus refúgium nobis.
Léctio Epístulae prioris beáti Pauli apóstoli ad Corínthios
Sic nos exístimet homo ut minístros Christi et dispensatóres mysteriórum Dei.
Hic iam quaéritur inter dispensatóres, ut fidélis quis inveniátur.
Mihi autem pro mínimo est, ut a vobis iúdicer aut ab humáno die. Sed neque meípsum iúdico ; nihil enim mihi cónscius sum, sed non in hoc iustificátus sum. Qui autem iúdicat me, Dóminus est !
Itaque nolíte ante tempus quidquam iudicáre, quoadúsque véniat Dóminus, qui et illuminábit abscóndita tenebrárum et manifestábit consília córdium ; et tunc laus erit unicuíque a Deo.
Allelúia, allelúia.
Vivus est Dei sermo et éfficax et discrétor cogitatiónum et intentiónum cordis.
Allelúia.
Léctio sancti Evangélii secúndum Matthaéum
Dixit Iesus discípulis suis :
«Nemo potest duóbus dóminis servíre ; aut enim unum ódio habébit et álterum díliget aut unum sustinébit et álterum contémnet ; non potéstis Deo servíre et mammónae.
Ideo dico vobis : Ne sollíciti sitis ánimae vestrae quid manducétis, neque córpori vestro quid induámini. Nonne ánima plus est quam esca, et corpus quam vestiméntum ? Respícite volatília caeli, quóniam non serunt neque metunt neque cóngregant in hórrea, et Pater vester caeléstis pascit illa. Nonne vos magis pluris estis illis ? Quis autem vestrum cógitans potest adícere ad aetátem suam cúbitum unum ?
Et de vestiménto quid sollíciti estis ? Consideráte lília agri quómodo crescunt : non labórant neque nent. Dico autem vobis quóniam nec Sálomon in omni glória sua coopértus est sicut unum ex istis. Si autem fenum agri quod hódie est et cras in clíbanum míttitur, Deus sic vestit, quanto magis vos, módicae fídei ?
Nolíte ergo sollíciti esse dicéntes : “Quid manducábimus ?”, aut : “Quid bibémus ?”, aut : “Quo operiémur ?”. Haec enim ómnia gentes inquírunt ; scit enim Pater vester caeléstis quia his ómnibus indigétis. Quaérite autem primum regnum Dei et iustítiam eius, et haec ómnia adiciéntur vobis. Nolíte ergo esse sollíciti in crástinum ; crástinus enim dies sollícitus erit sibi ipse. Súfficit diéi malítia sua».
Deus, qui offerénda tuo nómini tríbuis, et obláta devotióni nostrae servitútis ascríbis, quaésumus cleméntiam tuam, ut, quod praestas unde sit méritum, profícere nobis largiáris ad praémium. Per Christum Dóminum nostrum.
Vere dignum et iustum est, aequum et salutáre, nos tibi semper et ubíque grátias ágere : Dómine, sancte Pater, omnípotens aetérne Deus :
In quo vívimus, movémur et sumus, atque in hoc córpore constitúti non solum pietátis tuae cotidiános experímur efféctus, sed aeternitátis étiam pígnora iam tenémus.
Primítias enim Spíritus habéntes, qui suscitávit Iesum a mórtuis, paschále mystérium sperámus nobis esse perpétuum. Unde et nos tibi grátias ágimus, et tuas virtútes cum Angelis praedicámus, dicéntes :
Sanctus…
- Cantábo Dómino, qui bona tríbuit mihi, et psallam nómini Dómini Altíssimi.
- Ecce ego vobíscum sum ómnibus diébus, usque ad consummatiónem saéculi, dicit Dóminus.
Satiáti múnere salutári, tuam, Dómine, misericórdiam deprecámur, ut, hoc eódem quo nos temporáliter végetas sacraménto, perpétuae vitae partícipes benígnus effícias. Per Christum Dóminum nostrum.
hebdomada VIII per annum
feria secunda
Factus est Dóminus protéctor meus, et edúxit me in latitúdinem, salvum me fecit, quóniam vóluit me.
Da nobis, quaésumus, Dómine, ut et mundi cursus pacífico nobis tuo órdine dirigátur, et Ecclésia tua tranquílla devotióne laetétur. Per Dóminum.
1.
Léctio libri Ecclesiástici
Paeniténtibus dedit Deus viam réditus et confirmávit deficiéntes sustinére et destinávit illis sortem veritátis.
Convértere ad Dóminum et relínque peccáta tua ; precáre ante fáciem Dómini et mínue offendícula. Revértere ad Altíssimum et avértere ab iniustítia tua et nimis ódito exsecratiónem.
Et cognósce iustítias et iudícia Dei et sta in sorte propositiónis et oratiónis altíssimi Dei. Altíssimum quis laudábit in ínferis pro vivis et dántibus confessiónem Deo ?
Non demoréris in erróre impiórum ; ante mortem confitére : a mórtuo, quasi nihil sit, perit conféssio. Confitéberis vivens, vivus et salus confitéberis et laudábis Deum et gloriáberis in miseratiónibus illíus.
Quam magna misericórdia Dómini, et propitiátio illíus converténtibus ad se !
Psalmus
Beátus, cui remíssa est iníquitas et obtéctum est peccátum.
Beátus vir, cui non imputávit Dóminus delíctum, nec est in spíritu eius dolus.
Peccátum meum cógnitum tibi feci et delíctum meum non abscóndi.
Dixi : «Confitébor advérsum me iniquitátem meam Dómino». Et tu remisísti impietátem peccáti mei.
Propter hoc orábit ad te omnis sanctus in témpore opportúno.
Et in dilúvio aquárum multárum ad eum non approximábunt.
Tu es refúgium meum, a tribulatióne conservábis me ; exsultatiónibus salútis circúmdabis me.
2.
Léctio Epístulae prióris beáti Petri apóstoli
Benedíctus Deus et Pater Dómini nostri Iesu Christi, qui secúndum magnam misericórdiam suam regenerávit nos in spem vivam per resurrectiónem Iesu Christi ex mórtuis, in hereditátem incorruptíbilem et incontaminátam et immarcescíbilem, conservátam in caelis propter vos, qui in virtúte Dei custodímini per fidem in salútem parátam revelári in témpore novíssimo.
In quo exsultátis, módicum nunc si opórtet contristári in váriis tentatiónibus, ut probátio vestrae fídei multo pretiósior autro, quod perit, per ignem quidem probáto, inveniátur in laudem et glóriam et honórem in revelatióne Iesu Christi.
Quem cum non vidéritis, dilígitis ; in quem nunc non vidéntes, credéntes autem, exsultátis laetítia inenarrábili et glorificáta, reportántes finem fídei vestrae salútem animárum.
Psalmus
Confitébor Dómino in toto corde meo, in consílio iustórum et congregatióne.
Magna ópera Dómini, exquirénda ómnibus, qui cúpiunt ea.
Escam dedit timéntibus se ; memor erit in saéculum testaménti sui.
Virtútem óperum suórum annuntiávit pópulo suo, ut det illis hereditátem géntium.
Redemptiónem misit pópulo suo, mandávit in aetérnum testaméntum suum.
Sanctum et terríbile nomen eius ; laudátio eius manet in saéculum saéculi.
Allelúia, allelúia.
Iesus Christus egénus factus est, cum esset dives, ut illíus inópia vos dívites essétis.
Allelúia.
Léctio sancti Evangélii secúndum Marcum
Cum egrederétur Iesus in viam, accúrrens quidam et, genu flexo ante eum, rogábat eum : «Magíster bone, quid fáciam ut vitam aetérnam percípiam ?».
Iesus autem dixit ei : «Quid me dicis bonum ? Nemo bonus nisi unus Deus. Praecépta nosti : ne occídas, ne adúlteres, ne furéris, ne falsum testimónium díxeris, ne fraudem féceris, honóra patrem tuum et matrem».
Ille autem dixit ei : «Magíster, haec ómnia conservávi a iuventúte mea».
Iesus autem intúitus eum diléxit eum et dixit illi : «Unum tibi deest : vade, quaecúmque habes, vende et da paupéribus et habébis thesáurum in caelo et veni, séquere me».
Qui constritátus in hoc verbo, ábiit maerens : erat enim habens possessiónes multas.
Et circumspíciens Iesus ait discípulis suis : «Quam diffícile, qui pecúnias habent, in regnum Dei introíbunt». Discípuli autem obstupescébant in verbis eius. At Iesus rursus respóndens ait illis : «Fílii, quam diffícile est in regnum Dei introíre. Facílius est camélum per forámen acus transíre quam dívitem intráre in regnum Dei».
Qui magis admirabántur dicéntes ad semetípsos : «Et quis potest salvus fíeri ?». Intuens illos Iesus ait : «Apud hómines impossíbile est sed non apud Deum : ómnia enim possibília sunt apud Deum».
Deus, qui offerénda tuo nómini tríbuis, et obláta devotióni nostrae servitútis ascríbis, quaésumus cleméntiam tuam, ut, quod praestas unde sit méritum, profícere nobis largiáris ad praémium. Per Christum Dóminum nostrum.
- Cantábo Dómino, qui bona tríbuit mihi, et psallam nómini Dómini Altíssimi.
- Ecce ego vobíscum sum ómnibus diébus, usque ad consummatiónem saéculi, dicit Dóminus.
Satiáti múnere salutári, tuam, Dómine, misericórdiam deprecámur, ut, hoc eódem quo nos temporáliter végetas sacraménto, perpétuae vitae partícipes benígnus effícias. P
hebdomada VIII per annum
feria tertia
Factus est Dóminus protéctor meus, et edúxit me in latitúdinem, salvum me fecit, quóniam vóluit me.
Da nobis, quaésumus, Dómine, ut et mundi cursus pacífico nobis tuo órdine dirigátur, et Ecclésia tua tranquílla devotióne laetétur. Per Dóminum.
1.
Léctio libri Ecclesiástici
Qui consérvat legem, multíplicat oblatiónes : sacrifícium salutáre est atténdere mandátis. Qui retríbuit grátiam, offert similáginem, et, qui facit eleemósynam, offert sacrifícium laudis.
Beneplácitum est Dómino recédere ab iniquitáte, et deprecátio pro peccátis recédere ab iniustítia. Non apparébis ante conspéctum Dómini vácuus : haec enim ómnia propter mandátum Dei fiunt. Oblátio iusti impínguat altáre, et odor suavitátis illíus est in conspéctu Altíssimi ; sacrifícium iusti accéptum est, et memóriam eius non obliviscétur Dóminus.
Bono óculo glóriam redde Deo et non mínuas primítias mánuum tuárum ; in omni dato hílarem fac vultum tuum et in exsultatióne sanctífica décimas tuas ; da Altíssimo secúndum datum eius et in bono óculo ad inventiónem fácito mánuum tuárum, quóniam Dóminus retríbuens est et sépties tantum reddet tibi.
Noli offérre múnera prava, non enim suscípiet illa ; et noli confídere in sacrifício iniústo, quóniam Dóminus iudex est, et non est apud illum glória persónae.
Psalmus
Congregáte mihi sanctos meos, qui disposuérunt testaméntum meum in sacrifício».
Et annuntiábunt caeli iustítiam eius, quóniam Deus iudex est.
«Audi, pópulus meus, et loquar, Israel, et testificábor advérsum te : Deus, Deus tuus ego sum.
Non in sacrifíciis tuis árguam te ; holocáusta enim tua in conspéctu meo sunt semper.
Immola Deo sacrifícium laudis et redde Altíssimo vota tua ;
Qui immolábit sacrifícium laudis, honorificábit me, et, qui immaculátus est in via, osténdam illi salutáre Dei».
2.
Léctio Epístulae prióris beáti Petri apóstoli
De salúte animárum exquisiérunt atque scrutáti sunt prophétae, qui de futúra in vos grátia prophetavérunt, scrutántes in quod vel quale tempus significáret, qui erat in eis Spíritus Christi, praenúntians eas, quae in Christo sunt, passiónes et posterióres glórias ; quibus revelátum est quia non sibi ipsis, vobis autem ministrábant ea, quae nunc nuntiáta sunt vobis per eos, qui evangelizavérunt vos, Spiritu Sancto misso de caelo, in quae desíderant ángeli prospícere.
Propter quod succíncti lumbos mentis vestrae, sóbrii, perfécte speráte in eam, quae offértur vobis, grátiam in revelatióne Iesu Christi. Quasi fílii oboediéntiae, non configuráti prióribus in ignorántia vestra desidériis, sed secúndum eum, qui vocávit vos, sanctum, et ipsi sancti in omni conversatióne sitis, quóniam scriptum est : «Sancti éritis, quia ego sanctus sum».
Psalmus
Cantáte Dómino cánticum novum, quia mirabília fecit.
Salvávit sibi déxtera eius, et bráchium sanctum eius.
Notum fecit Dóminus salutáre suum, in conspéctu géntium revelávit iustítiam suam.
Recordátus est misericórdiae suae et veritátis suae dómui Israel.
Vidérunt omnes términi terrae salutáre Dei nostri.
Iubiláte Deo, omnis terra, erúmpite, exsultáte et psállite.
Allelúia, allelúia.
Benedíctus es, Pater, Dómine caeli et terrae, quia mystéria regni párvulis revelásti.
Allelúia.
Léctio sancti Evangélii secúndum Marcum
Coepit Petrus Iesu dícere : «Ecce nos dimísimus ómnia et secúti sumus te».
Ait Iesus :
«Amen dico vobis : Nemo est, qui relíquerit domum aut fratres aut soróres aut matrem aut patrem aut fílios aut agros propter me et propter evangélium, qui non accípiat cénties tantum nunc in témpore hoc, domos et fratres et soróres et matres et fílios et agros cum persecutiónibus, et in saéculo futúro vitam aetérnam.
Multi autem erunt primi novíssimi et novíssimi primi».
Deus, qui offerénda tuo nómini tríbuis, et obláta devotióni nostrae servitútis ascríbis, quaésumus cleméntiam tuam, ut, quod praestas unde sit méritum, profícere nobis largiáris ad praémium. Per Christum Dóminum nostrum.
- Cantábo Dómino, qui bona tríbuit mihi, et psallam nómini Dómini Altíssimi.
- Ecce ego vobíscum sum ómnibus diébus, usque ad consummatiónem saéculi, dicit Dóminus.
Satiáti múnere salutári, tuam, Dómine, misericórdiam deprecámur, ut, hoc eódem quo nos temporáliter végetas sacraménto, perpétuae vitae partícipes benígnus effícias. Per Christum Dóminum nostrum.
hebdomada VIII per annum
feria quarta
Factus est Dóminus protéctor meus, et edúxit me in latitúdinem, salvum me fecit, quóniam vóluit me.
Da nobis, quaésumus, Dómine, ut et mundi cursus pacífico nobis tuo órdine dirigátur, et Ecclésia tua tranquílla devotióne laetétur. Per Dóminum.
1.
Léctio libri Ecclesiástici
Miserére nostri, Deus ómnium, et réspice nos et osténde nobis lucem miseratiónum tuárum ; et immítte timórem tuum super gentes, quae non exquisiérunt te, ut cognóscant quia non est Deus nisi tu, et enárrent magnália tua.
Alleva manum tuam super gentes aliénas, ut vídeant poténtiam tuam. Sicut enim in conspéctu eórum sanctificátus es in nobis, sic in conspéctu nostro magnificáberis in eis, ut cognóscant, sicut et nos cognóvimus, quóniam non est Deus praeter te, Dómine.
Innova signa et ítera mirabília. Cóngrega omnes tribus Iacob, et hereditábis eos sicut ab inítio. Miserére plebi tuae, super quam invocátum est nomen tuum, et Israel, quem coaequásti primogénito tuo. Miserére civitáti sanctificatiónis tuae, Ierúsalem, loco requiéi tuae. Reple Sion maiestáte tua et glória tua templum tuum.
Da testimónium his, qui ab inítio creatúrae tuae sunt, et súscita praedicatiónes, quas locúti sunt in nómine tuo. Da mercédem sustinéntibus te, ut prophétae tui fidéles inveniántur. Et exáudi oratiónes servórum tuórum, secúndum beneplácitum super pópulo tuo, et dírige nos in viam iustítiae, et sciant omnes, qui hábitant terram, quia tu es Deus saeculórum.
Psalmus
Adiuva nos, Deus salutáris nostri, propter glóriam nóminis tui et líbera nos ;
Et propítius esto peccátis nostris propter nomen tuum.
Intróeat in conspéctu tuo gémitus compeditórum ; secúndum magnitúdinem bráchii tui supérstites relínque fílios mortis.
Nos autem, pópulus tuus et oves páscuae tuae, confitébimur tibi in saéculum ;
In generatiónem et generatiónem annuntiábimus laudem tuam.
2.
Léctio Epístulae prióris beáti Petri apóstoli
Scitis quod non corruptibílibus argénto vel auro redémpti estis de vana vestra conversatióne a pátribus trádita, sed pretióso sánguine quasi Agni incontamináti et immaculáti Christi, praecógniti quidem ante constitutiónem mundi, manifestáti autem novíssimis tempóribus propter vos, qui per ipsum fidéles estis in Deum, qui suscitávit eum a mórtuis et dedit ei glóriam, ut fides vestra et spes esset in Deum.
Animas vestras castificántes in oboediéntia veritátis ad fraternitátis amórem non fictum, ex corde ínvicem dilígite atténtius, renáti non ex sémine corruptíbili sed incorruptíbili per verbum Dei vivum et pérmanens ; quia omnis caro ut fenum, et omnis glória eius tamquam flos feni. Exáruit fenum, et flos décidit ; verbum autem Dómini manet in aetérnum.
Hoc est autem verbum, quod evangelizátum est in vos.
Psalmus
Lauda, Ierúsalem, Dóminum ; colláuda Deum tuum, Sion.
Quóniam confortávit seras portárum tuárum, benedíxit fíliis tuis in te.
Qui ponit fines tuos pacem et ádipe fruménti sátiat te.
Qui emíttit elóquium suum terrae, velóciter currit verbum eius.
Qui annúntiat verbum suum Iacob, iustítias et iudícia sua Israel.
Non fecit táliter omni natióni, et iudícia sua non manifestávit eis.
Allelúia, allelúia.
Fílius hóminis venit ut ministráret, et daret ánimam suam redemptiónem pro multis.
Allelúia.
Léctio sancti Evangélii secúndum Marcum
Erant discípuli in via ascendéntes in Hierosólymam, et praecedébat illos Iesus, et stupébant ; illi autem sequéntes timébant. Et assúmens íterum Duódecim coepit illis dícere, quae essent ei eventúra :
«Ecce ascéndimus in Hierosólymam ; et Fílius hóminis tradétur princípibus sacerdótum et scribis, et damnábunt eum morte et tradent eum géntibus et illúdent ei et cónspuent eum et flagellábunt eum et interfícient eum, et post tres dies resúrget».
Et accédunt ad eum Iacóbus et Ioánnes fílii Zebedaéi dicéntes ei : «Magíster, vólumus, ut quodcúmque petiérimus a te, fácias nobis». At ille dixit eis : «Quid vultis, ut fáciam vobis ?».
Illi autem dixérunt ei : «Da nobis, ut unus ad déxteram tuam et álius ad sinístram sedeámus in glória tua». Iesus autem ait eis : «Nescítis quid petátis. Potéstis bíbere cálicem, quem ego bibo, aut baptísmum, quo ego baptízor, baptizári ?».
At illi dixérunt ei : «Póssumus». Iesus autem ait eis : «Cálicem quidem, quem ego bibo, bibétis et baptísmum, quo ego baptízor, baptizabímini ; sedére autem ad déxteram meam vel ad sinístram non est meum dare, sed quibus parátum est».
Et audiéntes decem coepérunt indignári de Iacóbo et Ioánne. Et vocans eos Iesus ait illis :
«Scitis quia hi, qui vidéntur principári géntibus, dominántur eis, et príncipes eórum potestátem habent ipsórum. Non ita est autem in vobis, sed quicúmque volúerit fíeri maior inter vos, erit vester miníster ; et, quicúmque volúerit in vobis primus esse, erit ómnium servus ; nam et Fílius hóminis non venit, ut ministrarétur ei, sed ut ministráret et daret ánimam suam redemptiónem pro multis».
Deus, qui offerénda tuo nómini tríbuis, et obláta devotióni nostrae servitútis ascríbis, quaésumus cleméntiam tuam, ut, quod praestas unde sit méritum, profícere nobis largiáris ad praémium. Per Christum Dóminum nostrum.
- Cantábo Dómino, qui bona tríbuit mihi, et psallam nómini Dómini Altíssimi.
- Ecce ego vobíscum sum ómnibus diébus, usque ad consummatiónem saéculi, dicit Dóminus.
Satiáti múnere salutári, tuam, Dómine, misericórdiam deprecámur, ut, hoc eódem quo nos temporáliter végetas sacraménto, perpétuae vitae partícipes benígnus effícias. Per Christum Dóminum nostrum.
hebdomada VIII per annum
feria quinta
Factus est Dóminus protéctor meus, et edúxit me in latitúdinem, salvum me fecit, quóniam vóluit me.
Da nobis, quaésumus, Dómine, ut et mundi cursus pacífico nobis tuo órdine dirigátur, et Ecclésia tua tranquílla devotióne laetétur. Per Dóminum.
1.
Léctio libri Ecclesiástici
Memor ero óperum Dómini et, quae vidi, annuntiábo : in sermónibus Dómini ópera eius, et factum est in voluntáte sua iudícium. Sol illúminans per ómnia respéxit, et glória Dómini plenum est opus eius.
Non valent sancti Dómini enarráre ómnia mirabília eius. Confirmávit Dóminus exércitus suos stabilíri coram glória sua. Abýssum et cor hóminum investigávit et in astútia eórum excogitávit. Cognóvit enim Dóminus omnem sciéntiam et inspéxit in signum aevi annúntians, quae praeteriérunt et quae superventúra sunt, et revélans vestígia occultórum. Non praéterit illum omnis cogitátus, et non abscóndit se ab eo ullus sermo.
Magnália sapiéntiae suae ordinávit, únicus est ante saéculum et usque in saéculum ; neque augétur neque minúitur et non eget alicúius consílio.
Quam desiderabília ómnia ópera eius, et tamquam scintílla spectátu ! Omnia haec vivunt et manent in saéculum, et in omni necessitáte ómnia obáudiunt ei ; ómnia duplícia, unum contra unum, et non fecit quidquam defíciens. Alterum alteríus confírmat bonum ; et quis satiábitur videns glóriam eius ?
Psalmus
Confitémini Dómino in cíthara, in psaltério decem chordárum psállite illi.
Cantáte ei cánticum novum, bene psállite ei in vociferatióne.
Quia rectum est verbum Dómini, et ómnia ópera eius in fide.
Díligit iustítiam et iudícium, misericórdia Dómini plena est terra.
Verbo Dómini caeli facti sunt, et spíritu oris eius omnis virtus eórum.
Cóngregans sicut in utre aquas maris, ponens in thesáuris abýssos.
Tímeat Dóminum omnis terra, a fácie autem eius formídent omnes inhabitántes orbem.
Quóniam ipse dixit, et facta sunt, ipse mandávit, et creáta sunt.
2.
Léctio Epístulae prióris beáti Petri apóstoli
Sicut modo géniti infántes, rationále sine dolo lac concupíscite, ut in eo crescátis in salútem, si gustástis quóniam dulcis Dóminus. Ad quem accedéntes, lápidem vivum, ab homínibus quidem reprobátum, coram Deo autem eléctum, pretiósum, et ipsi tamquam lápides vivi aedificámini domus spiritális in sacerdótium sanctum offérre spiritáles hóstias acceptábiles Deo per Iesum Christum.
Vos autem genus eléctum, regále sacerdótium, gens sancta, pópulus in acquisitiónem, ut virtútes annuntiétis eius, qui de ténebris vos vocávit in admirábile lumen suum ; qui aliquándo non pópulus, nunc autem pópulus Dei ; qui non consecúti misericórdiam, nunc autem misericórdiam consecúti.
Caríssimi, óbsecro tamquam ádvenas et peregrínos abstinére vos a carnálibus desidériis, quae mílitant advérsus ánimam ; conversatiónem vestram inter gentes habéntes bonam, ut in eo, quod detréctant de vobis tamquam de malefactóribus, ex bonis opéribus considerántes gloríficent Deum in die visitatiónis.
Psalmus
Iubiláte Dómino, omnis terra, servíte Dómino in laetítia ;
Introíte in conspéctu eius in exsultatióne.
Scitóte quóniam Dóminus ipse est Deus ; ipse fecit nos, et ipsíus sumus, pópulus eius et oves páscuae eius.
Introíte portas eius in confessióne, átria eius in hymnis, confitémini illi, benedícite nómini eius.
Quóniam suávis est Dóminus ; in aetérnum misericórdia eius, et usque in generatiónem et generatiónem véritas eius.
Allelúia, allelúia.
Ego sum lux mundi, dicit Dóminus ; qui séquitur me habébit lumen vitae.
Allelúia.
Léctio sancti Evangélii secúndum Marcum
Proficiscénte Iesu de Iéricho et discípulis eius et plúrima multitúdine, fílius Timaéi Bartimaéus caecus sedébat iuxta viam méndicans.
Qui cum audísset quia Iesus Nazarénus est, coepit clamáre et dícere : «Fili David Iesu, miserére mei !». Et comminabántur ei multi, ut tacéret ; at ille multo magis clamábat : «Fili David, miserére mei !».
Et stans Iesus dixit : «Vocáte illum». Et vocant caecum dicéntes ei : «Animaéquior esto. Surge, vocat te». Qui, proiécto vestiménto suo, exsíliens venit ad Iesum.
Et respóndens ei Iesus dixit : «Quid vis tibi fáciam ?». Caecus autem dixit ei : «Rabbóni, ut vídeam».
Et Iesus ait illi : «Vade ; fides tua te salvum fecit». Et conféstim vidit et sequebátur eum in via.
Deus, qui offerénda tuo nómini tríbuis, et obláta devotióni nostrae servitútis ascríbis, quaésumus cleméntiam tuam, ut, quod praestas unde sit méritum, profícere nobis largiáris ad praémium. Per Christum Dóminum nostrum.
- Cantábo Dómino, qui bona tríbuit mihi, et psallam nómini Dómini Altíssimi.
- Ecce ego vobíscum sum ómnibus diébus, usque ad consummatiónem saéculi, dicit Dóminus.
Satiáti múnere salutári, tuam, Dómine, misericórdiam deprecámur, ut, hoc eódem quo nos temporáliter végetas sacraménto, perpétuae vitae partícipes benígnus effícias. Per Christum Dóminum nostrum.
hebdomada VIII per annum
feria sexta
Factus est Dóminus protéctor meus, et edúxit me in latitúdinem, salvum me fecit, quóniam vóluit me.
Da nobis, quaésumus, Dómine, ut et mundi cursus pacífico nobis tuo órdine dirigátur, et Ecclésia tua tranquílla devotióne laetétur. Per Dóminum.
1.
Léctio libri Ecclesiástici
Laudémus viros gloriósos et paréntes nostros in generatióne sua.
Sunt quorum non est memória : periérunt quasi qui non fúerint ; et nati sunt quasi non nati, et fílii ipsórum post ipsos.
Sed hi viri misericórdiae sunt, quorum pietátes non fuérunt in oblivióne. Cum sémine eórum pérmanent, bona heréditas, nepótes eórum, et in testaméntis stetit semen eórum ; et fílii eórum propter illos. Usque in aetérnum manet semen eórum, et glória eórum non derelinquétur.
Psalmus
Cantáte Dómino cánticum novum ; laus eius in ecclésia sanctórum.
Laetétur Israel in eo, qui fecit eum, et fílii Sion exsúltent in rege suo.
Laudent nomen eius in choro, in týmpano et cíthara psallant ei,
Quia beneplácitum est Dómino in pópulo suo, et honorábit mansuétos in salúte.
Iúbilent sancti in glória, laeténtur in cubílibus suis.
Exaltatiónes Dei in gútture eórum : glória haec est ómnibus sanctis eius.
2.
Léctio Epístulae prióris beáti Petri apóstoli
Omnium finis appropinquávit.
Estóte ítaque prudéntes et vigiláte in oratiónibus.
Ante ómnia mútuam in vosmetípsos caritátem contínuam habéntes, quia cáritas óperit multitúdinem peccatórum ; hospitáles ínvicem sine murmuratióne ; unusquísque, sicut accépit donatiónem, in altérutrum illam administrántes sicut boni dispensatóres multifórmis grátiae Dei.
Si quis lóquitur, quasi sermónes Dei ; si quis minístrat, tamquam ex virtúte, quam largítur Deus, ut in ómnibus glorificétur Deus per Iesum Christum : cui est glória et impérium in saécula saeculórum. Amen.
Caríssimi, nolíte mirári in fervóre, qui ad tentatiónem vobis fit, quasi novi áliquid vobis contíngat, sed, quemádmodum communicátis Christi passiónibus, gaudéte, ut et in revelatióne glóriae eius gaudeátis exsultántes.
Psalmus
Dícite in géntibus : «Dóminus regnávit !».
Etenim corréxit orbem terrae, qui non commovébitur ; iudicábit pópulos in aequitáte.
Laeténtur caeli, et exsúltet terra, sonet mare et plenitúdo eius ; gaudébunt campi et ómnia, quae in eis sunt.
Tunc exsultábunt ómnia ligna silvárum a fácie Dómini, quia venit, quóniam venit iudicáre terram.
Iudicábit orbem terrae in iustítia et pópulos in veritáte sua.
Allelúia, allelúia.
Ego vos elégi de mundo, ut eátis et fructum afferátis, et fructus vester máneat, dicit Dóminus.
Allelúia.
Léctio sancti Evangélii secúndum Marcum
Introívit Iesus Hierosólymam in templum ; et circumspéctis ómnibus, cum iam véspera esset hora, exívit in Bethániam cum Duódecim.
Et áltera die cum exírent a Bethánia, esúriit. Cumque vidísset a longe ficum habéntem fólia, venit si quid forte inveníret in ea ; et cum venísset ad eam, nihil invénit praeter fólia : non enim erat tempus ficórum. Et respóndens dixit ei : «Iam non ámplius in aetérnum quisquam fructum ex te mandúcet». Et audiébant discípuli eius.
Et véniunt Hierosólymam. Et cum introísset in templum, coepit eícere vendéntes et eméntes in templo et mensas nummulariórum et cáthedras vendéntium colúmbas evértit, et non sinébat, ut quisquam vas transférret per templum. Et docébat dicens eis : «Non scriptum est : “Domus mea domus oratiónis vocábitur ómnibus géntibus” ? Vos autem fecístis eam spelúncam latrónum».
Quo audíto, príncipes sacerdótum et scribae quaerébant quómodo eum pérderent ; timébant enim eum, quóniam univérsa turba admirabátur super doctrína eius. Et cum véspera facta esset, egrediebántur de civitáte.
Et cum mane transírent, vidérunt ficum áridam factam a radícibus. Et recordátus Petrus dicit ei : «Rabbi, ecce ficus, cui maledixísti, áruit». Et respóndens Iesus ait illis : «Habéte fidem Dei ! Amen dico vobis : Quicúmque díxerit huic monti : “Tóllere et míttere in mare”, et non haesitáverit in corde suo, sed credíderit quia, quod díxerit, fiat, fiet ei. Proptérea dico vobis : Omnia, quaecúmque orántes pétitis, crédite quia iam accepístis, et erunt vobis. Et cum statis in oratióne, dimíttite, si quid habétis advérsus aliquem, ut et Pater vester, qui in caelis est, dimíttat vobis peccáta vestra.»
Deus, qui offerénda tuo nómini tríbuis, et obláta devotióni nostrae servitútis ascríbis, quaésumus cleméntiam tuam, ut, quod praestas unde sit méritum, profícere nobis largiáris ad praémium. Per Christum Dóminum nostrum.
- Cantábo Dómino, qui bona tríbuit mihi, et psallam nómini Dómini Altíssimi.
- Ecce ego vobíscum sum ómnibus diébus, usque ad consummatiónem saéculi, dicit Dóminus.
Satiáti múnere salutári, tuam, Dómine, misericórdiam deprecámur, ut, hoc eódem quo nos temporáliter végetas sacraménto, perpétuae vitae partícipes benígnus effícias. Per Christum Dóminum nostrum.
hebdomada VIII per annum
sabbato
Factus est Dóminus protéctor meus, et edúxit me in latitúdinem, salvum me fecit, quóniam vóluit me.
Da nobis, quaésumus, Dómine, ut et mundi cursus pacífico nobis tuo órdine dirigátur, et Ecclésia tua tranquílla devotióne laetétur. Per Dóminum.
1.
Léctio libri Ecclesiástici
Confitébor et laudem dicam tibi et benedícam nómini Dómini.
Cum adhuc iúnior essem, priúsquam oberrárem, quaesívi sapiéntiam palam in oratióne mea ; ante templum postulábam pro illa et usque in novíssimis inquíram eam, et efflóruit tamquam praecox uva. Laetátum est cor meum in ea, ambulávit pes meus iter rectum ; a iuventúte mea investigábam eam. Inclinávi módice aurem meam et excépi illam et multam invéni mihimetípsi sapiéntiam et multum proféci in ea : danti mihi sapiéntiam dabo glóriam.
Consiliátus sum enim, ut fácerem illam ; et quaesívi bonum et non confúndar. Colluctáta est ánima mea in illa, et in faciéndo legem díligens fui. Manus meas exténdi in altum et incognoscibília eius intelléxi. Animam meam diréxi ad illam et in purificatióne invéni eam.
Psalmus
Lex Dómini immaculáta, refíciens ánimam, testimónium Dómini fidéle, sapiéntiam praestans párvulis.
Iustítiae Dómini rectae, laetificántes corda, praecéptum Dómini lúcidum, illúminans óculos.
Timor Dómini mundus, pérmanens in saéculum saéculi, iudícia Dómini vera, iusta ómnia simul,
Desiderabília super aurum et lápidem pretiósum multum et dulcióra super mel et favum stillántem.
2.
Léctio Epístulae prióris beáti Iudae apóstoli
Vos, caríssimi, mémores estóte verbórum, quae praedícta sunt ab apóstolis Dómini nostri Iesu Christi.
Vos autem, caríssimi, superaedificántes vosmetípsos sanctíssimae vestrae fídei, in Spiritu Sancto orántes, ipsos vos in dilectióne Dei serváte, exspectántes misericórdiam Dómini nostri Iesu Christi in vitam aetérnam.
Et his quidem miserémini disputántibus, illos vero salváte de igne, rapiéntes, áliis autem miserémini in timóre, odiéntes et eam, quae carnális est, maculátam túnicam.
Ei autem, qui potest vos conserváre sine peccáto et constitúere ante conspéctum glóriae suae immaculátos in exsultatióne, soli Deo salvatóri nostro per Iesum Christum Dóminum nostrum glória, magnificéntia, impérium et potéstas ante omne saéculum et nunc et in ómnia saécula.
Amen.
Psalmus
Deus, Deus meus es tu, ad te de luce vígilo.
Sitívit in te ánima mea, te desiderávit caro mea.
In terra desérta et árida et inaquósa, sic in sancto appárui tibi, ut vidérem virtútem tuam et glóriam tuam.
Quóniam mélior est misericórdia tua super vitas, lábia mea laudábunt te.
Sic benedícam te in vita mea et in nómine tuo levábo manus meas.
Sicut ádipe et pinguédine repleátur ánima mea, et lábiis exsultatiónis laudábit os meum.
Allelúia, allelúia.
Verbum Christi hábitet in vobis abundánter ; grátias ágite Deo et Patri per Christum.
Allelúia.
Léctio sancti Evangélii secúndum Marcum
Véniunt rursus Hierosólymam Iesus cum discípulis. Et cum ambuláret in templo, accédunt ad eum summi sacerdótes et scribae et senióres et dicébant illi : «In qua potestáte haec facis ? Vel quis tibi dedit hanc potestátem, ut ista fácias ?».
Iesus autem ait illis :
«Interrogábo vos unum verbum, et respondéte mihi, et dicam vobis, in qua potestáte haec fáciam : Baptísmum Ioánnis de caelo erat an ex homínibus ? Respondéte mihi».
At illi cogitábant secum dicéntes : «Si dixérimus : “de caelo”, dicet “Quare ergo non credidístis ei ?” ; si autem dixérimus : “Ex homínibus” ?». Timébant pópulum : omnes enim habébant Ioánnem quia vere prophéta esset. Et respondéntes dicunt Iesu : «Nescímus».
Et Iesus ait illis : «Neque ego dico vobis in qua potestáte haec fáciam».
Deus, qui offerénda tuo nómini tríbuis, et obláta devotióni nostrae servitútis ascríbis, quaésumus cleméntiam tuam, ut, quod praestas unde sit méritum, profícere nobis largiáris ad praémium. Per Christum Dóminum nostrum.
- Cantábo Dómino, qui bona tríbuit mihi, et psallam nómini Dómini Altíssimi.
- Ecce ego vobíscum sum ómnibus diébus, usque ad consummatiónem saéculi, dicit Dóminus.
Satiáti múnere salutári, tuam, Dómine, misericórdiam deprecámur, ut, hoc eódem quo nos temporáliter végetas sacraménto, perpétuae vitae partícipes benígnus effícias. Per Christum Dóminum nostrum.