die 1 ianuarii
In festo
Mariae Genetricis Dei
Salve, sancta Parens, eníxa puérpera Regem, qui caelum terrámque regit in saécula saeculórum.
Deus, qui salútis aetérnae, beátae Maríae virginitáte fecúnda humáno géneri praémia praestitísti, tríbue, quaésumus, ut ipsam pro nobis intercédere sentiámus, per quam merúimus Fílium tuum auctórem vitae suscípere. Qui tecum vivit.
Léctio libri Númeri
Locútus est Dóminus ad Móysen dicens : «Loquére Aaron et fíliis eius : Sic benedicétis fíliis Israel et dicétis eis :
Benedícat tibi Dóminus et custódiat te !
Illúminet Dóminus fáciem suam super te et misereátur tui !
Convértat Dóminus vultum suum ad te et det tibi pacem !».
Invocabúntque nomen meum super fílios Israel, et ego benedícam eis».
Deus misereátur nostri et benedícat nobis ; illúminet vultum suum super nos,
Ut cognoscátur in terra via tua, in ómnibus géntibus salutáre tuum.
Laeténtur et exsúltent gentes, quóniam iúdicas pópulos in aequitáte et gentes in terra dírigis.
Confiteántur tibi pópuli, Deus ; confiteántur tibi pópuli omnes.
Benedícat nos Deus, et métuant eum omnes fines terrae.
Léctio Epístulae beáti Pauli apóstoli
ad Gálatas
Fratres :
Ubi venit plenitúdo témporis, misit Deus Fílium suum, factum ex mulíere, factum sub lege, ut eos, qui sub lege erant, redímeret, ut adoptiónem filiórum reciperémus.
Quóniam autem estis fílii, misit Deus Spíritum Fílii sui in corda nostra clamántem : «Abba, Pater !». Itaque iam non es servus sed fílius ; quod si fílius, et heres per Deum.
Allelúia, allelúia.
Multifáriam et multis modis olim Deus locútus pátribus in prophétis, in novíssimis his diébus locútus est nobis in Fílio.
Allelúia.
Léctio sancti Evangélii secúndum Lucam
Pastóres venérunt festinántes et invenérunt Maríam et Ioseph et infántem pósitum in praesépio. Vidéntes autem notum fecérunt verbum, quod dictum erat illis de púero hoc. Et omnes, qui audiérunt, miráti sunt de his, quae dicta erant a pastóribus ad ipsos. María autem conservábat ómnia verba haec cónferens in corde suo.
Et revérsi sunt pastóres glorificántes et laudántes Deum in ómnibus, quae audiérant et vidérant, sicut dictum est ad illos.
Et postquam consummáti sunt dies octo, ut circumcideréur, vocátum est nomen eius Iesus, quod vocátum est ab ángelo, priúsquam in útero conciperétur.
Deus, qui bona cuncta ínchoas benígnus et pérficis, da nobis, de sollemnitáte sanctae Dei Genetrícis laetántibus, sicut de inítiis tuae grátiae gloriámur, ita de perfectióne gaudére. Per Christum.
Vere dignum et iustum est, aequum et salutáre, nos tibi semper et ubíque grátias ágere : Dómine, sancte Pater, omnípotens aetérne Deus :
Et te in maternitáte beátae Maríae semper Vírginis collaudáre, benedícere et praedicáre.
Quae et Unigénitum tuum Sancti Spíritus obumbratióne concépit, et, virginitátis glória permanénte, lumen aetérnum mundo effúdit, Iesum Christum Dóminum nostrum.
Per quem maiestátem tuam laudant Angeli, adórant Dominatiónes, tremunt Potestátes. Caeli caelorúmque Virtútes, ac beáta Séraphim, sócia exsultatióne concélebrant.
Cum quibus et nostras voces ut admítti iúbeas, deprecámur, súpplici confessióne dicéntes :
Sanctus…
Communicántes, et diem sacratíssimum celebrántes, quo beátae Maríae intemeráta virgínitas huic mundo édidit Salvatórem : sed et memóriam venerántes, in primis eiúsdem gloriósae semper Vírginis Maríae, Genetrícis eiúsdem Dei et Dómini nostri Iesu Christi : …
- Iesus Christus heri et hódie, ipse et in saécula.
Súmpsimus, Dómine, laeti sacraménta caeléstia : praesta, quaésumus, ut ad vitam nobis profíciant sempitérnam, qui beátam semper Vírginem Maríam Fílii tui Genetrícem et Ecclésiae Matrem profitéri gloriámur. Per Christum.
die 2 ianuarii
In festo
sanctorum Basilii Magni et Gregorii Nazianzeni
Deus, qui Ecclésiam tuam beatórum Basílii et Gregórii exémplis et doctrínis dignátus es illustráre, concéde, quaésumus, ut tuam discámus in humilitáte veritátem et eam in caritáte fidéliter operémur. Per Dóminum.
Léctio Epístulae beáti Pauli apóstoli
ad Ephésios
Fratres :
Obsecro vos ego vinctus in Dómino, ut digne ambulétis vocatióne, qua vocáti estis, cum omni humilitáte et mansuetúdine, cum longanimitáte, supportántes ínvicem in caritáte, sollíciti serváre unitátem spíritus in vínculo pacis.
Unum corpus et unus Spíritus, sicut et vocáti estis in una spe vocatiónis vestrae ; unus Dóminus, una fides, unum baptísma ; unus Deus et Pater ómnium, qui super omnes et per ómnia et in ómnibus.
Unicuíque autem nostrum data est grátia secúndum mensúram donatiónis Christi. Et ipse dedit quosdam quidem apóstolos, quosdam autem prophétas, álios vero evangelístas, álios autem pastóres et doctóres ad instructiónem sanctórum in opus ministérii, in aedificatiónem córporis Christi, donec occurrámus omnes in unitátem fídei et agnitiónis Fílii Dei, in virum perféctum, in mensúram aetátis plenitúdinis Christi.
Dóminus pascit me, et nihil mihi déerit :
in páscuis viréntibus me collocávit,
super aquas quiétis edúxit me,
ánimam meam refécit.
Dedúxit me super sémitas iustítiae propter nomen suum.
Nam et si ambulávero in valle umbrae mortis,
non timébo mala, quóniam tu mecum es.
Virga tua et báculus tuus,
ipsa me consoláta sunt.
Parásti in conspéctu meo mensam
advérsus eos, qui tríbulant me ;
impinguásti in óleo caput meum,
et calix meus redúndat.
Etenim benígnitas et misericórdia subsequéntur me
ómnibus diébus vitae meae,
et inhabitábo in domo Dómini
in longitúdinem diérum.
Allelúia, allelúia.
Unus est Pater vester, caeléstis ; et magíster vester unus est, Christus.
Allelúia.
Léctio sancti Evangélii secúndum Matthaéum
In illo témpore :
Dixit Iesus ad discípulos suos : «Vos nolíte vocári Rabbi ; unus enim est Magíster vester, omnes autem vos fratres estis.
Et Patrem nolíte vocáre vobis super terram, unus enim est Pater vester, caeléstis.
Nec vocémini Magístri ; quia Magíster vester unus est, Christus.
Qui maior est vestrum, erit miníster vester.
Qui autem se exaltáverit, humiliábitur ; et, qui se humiliáverit, exaltábitur».
die 3 ianuarii
In festo
sancti Nominis Iesu
In nómine Iesu omne genu flectátur caeléstium et terréstrium et infernórum, et omnis lingua confiteátur : «Dóminus Iesus Christus !», in glóriam Dei Patris.
Sanctíssimum Iesu nomen venerántibus, nobis, Dómine, concéde propítius, ut, eius in hac vita dulcédine perfruéntes, sempitérno gáudio in patria repleámur. Per Dóminum.
Léctio Epístulae beáti Pauli apóstoli
ad Philippénses
Fratres :
Si qua consolátio in Christo, si quod solácium caritátis, si qua commúnio spíritus, si quae víscera et miseratiónes, impléte gáudium meum, ut idem sapiátis, eándem caritátem habéntes, unánimes, id ipsum sapiéntes, nihil per contentiónem neque per inánem glóriam, sed in humilitáte superióres sibi ínvicem arbitrántes, non, quae sua sunt, sínguli considerántes, sed et ea, quae aliórum.
Hoc sentíte in vobis, quod et in Christo Iesu : qui cum in forma Dei esset, non rapínam arbitrátus est esse se aequálem Deo, sed semetípsum exinanívit formam servi accípiens, in similitúdinem hóminum factus ; et hábitu invéntus ut homo, humiliávit semetípsum factus oboédiens usque ad mortem, mortem autem crucis.
Propter quod et Deus illum exaltávit et donávit illi nomen, quod est super omne nomen, ut in nómine Iesu omne genu flectátur caeléstium et terréstrium et infernórum, et omnis lingua confiteátur : «Dóminus Iesus Christus !», in glóriam Dei Patris.
Quando vídeo caelos tuos, ópera digitórum tuórum, lunam et stellas, quae tu fundásti,
quid est homo, quod memor es eius ?
aut fílius hóminis, quóniam vísitas eum ?
Minuísti eum paulo minus ab ángelis,
glória et honóre coronásti eum
et constituísti eum super ópera mánuum tuárum.
Omnia subiecísti sub pédibus eius,
oves et boves univérsas,
ínsuper et pécora campi,
vólucres caeli et pisces maris, quaecúmque perámbulant sémitas maris.
Allelúia, allelúia.
Quod autem in ea natum est, de Spíritu Sancto est ; páriet autem fílium, et vocábis nomen eius Iesum.
Allelúia.
Léctio sancti Evangélii secúndum Lucam
Postquam consummáti sunt dies octo, ut circumciderétur puer, vocátum est nomen eius Iesus, quod vocátum est ab angelo, priúsquam in útero conciperétur.
Et postquam impléti sunt dies purgatiónis eórum secúndum legem Móysis, tulérunt Iesum in Hierosólymam, ut sísterent Dómino, sicut scriptum est in lege Dómini : «Omne masculínum adapériens vulvam sanctum Dómino vocábitur», et ut darent hóstiam secúndum quod dictum est in lege Dómini : par túrturum aut duos pullos columbárum.
In eius nómine, Pater omnípotens, múnera nostra dignáre suscípere, in quo quidquid petiérimus nos certe consecutúros esse confídimus, ipso Fílio tuo benigníssime pollicénte. Qui vivit.
Vere dignum et iustum est, aequum et salutáre, nos tibi semper et ubíque grátias ágere : Dómine, sancte Pater, omnípotens aetérne Deus : per Christum Dóminum nostrum.
Per quem hódie commércium nostrae reparatiónis effúlsit, quia, dum nostra fragílitas a tuo Verbo suscípitur, humána mortálitas non solum in perpétuum transit honórem, sed nos quoque, mirándo consórtio, reddit aetérnos.
Et ídeo, choris angélicis sociáti, te laudámus in gáudio confiténtes :
Sanctus…
- Non nomen áliud est sub caelo datum in homínibus, in quo opórtet nos salvos fíeri.
Tua nobis, quaésumus, Dómine, miseratióne concéde, ut in his sacris mystériis Dóminum Iesum dignis obséquiis venerémur, in cuius nómine voluísti omne genu flecti, omnésque hómines inveníre salútem. Per Christum.
die 7 ianuarii
In festo
sancti Raimundi de Peñafort
Deus, qui beátum Raimúndum presbýterum insígnis in peccatóres et in captívos misericórdiae virtúte decorásti, eius nobis intercessióne concéde, ut, a peccáti servitúte solúti, quae tibi sunt plácita líberis méntibus exsequámur. Per Dóminum.
Léctio Epístulae alteríus beáti Pauli apóstoli
ad Corínthios
Fratres :
Cáritas Christi urget nos, aestimántes hoc quóniam, si unus pro ómnibus mórtuus est, ergo omnes mórtui sunt ; et pro ómnibus mórtuus est, ut et, qui vivunt, iam non sibi vivant, sed ei, qui pro ipsis mórtuus est et resurréxit.
Itaque nos ex hoc néminem nóvimus secúndum carnem ; et si cognóvimus secúndum carnem Christum, sed nunc iam non nóvimus.
Si quis ergo in Christo, nova creatúra ; vétera transiérunt, ecce, facta sunt nova.
Omnia autem ex Deo, qui reconciliávit nos sibi per Christum et dedit nobis ministérium reconciliatiónis, quóniam quidem Deus erat in Christo mundum reconcílians sibi, non réputans illis delícta ipsórum, et pósuit in nobis verbum reconciliatiónis.
Pro Christo ergo legatióne fúngimur tamquam Deo exhortánte per nos : obsecrámus pro Christo, reconciliámini Deo.
Bénedic, ánima mea, Dómino,
et ómnia, quae intra me sunt, nómini sancto eius.
Bénedic, ánima mea, Dómino
et noli oblivísci omnes retributiónes eius.
Qui propitiátur ómnibus iniquitátibus tuis,
qui sanat omnes infirmitátes tuas ;
Qui rédimit de intéritu vitam tuam,
qui corónat te in misericórdia et miseratiónibus.
Miserátor et miséricors Dóminus,
longánimis et multae misericórdiae.
Non in perpétuum conténdet neque in aetérnum irascétur.
Quómodo miserétur pater filiórum,
misértus est Dóminus timéntibus se.
Quóniam ipse cognóvit figméntum nostrum,
recordátus est quóniam pulvis sumus.
Misericórdia autem Dómini ab aetérno et usque in aetérnum super timéntes eum ;
Et iustítia illíus in fílios filiórum,
in eos, qui servant testaméntum eius.
Allelúia, allelúia.
Vigiláte omni témpore orántes, ut possítis stare ante Fílium hóminis.
Allelúia.
Léctio sancti Evangélii secúndum Lucam
In illo témpore :
Dixit Iesus discípulis suis : «Sint lumbi vestri praecíncti et lucérnae ardéntes, et vos símiles homínibus exspectántibus dóminum suum, quando revertátur a núptiis, ut, cum vénerit et pulsáverit, conféstim apériant ei.
Beáti servi illi, quos cum vénerit dóminus invénerit vigilántes. Amen dico vobis, quod praecínget se et fáciet illos discúmbere, et tránsiens ministrábit illis.
Et si vénerit in secúnda vigília et si in tértia vigília vénerit et ita invénerit, beáti sunt illi.
Hoc autem scitóte quia, si sciret pater famílias qua hora fur veníret, non síneret perfódi domum suam.
Et vos estóte paráti, quia, qua hora non putátis, Fílius hóminis venit».
die 13 ianuarii
In festo
sancti Hilarii
Praesta, quaésumus, omnípotens Deus, ut divinitátem Fílii tui, quam beátus Hilárius epíscopus constánter asséruit, et conveniénter intellégere valeámus, et veráciter profitéri. Per Dóminum.
Léctio Epístulae primae beáti Ioánnis apóstoli
Filíoli, novíssima hora est ; et sicut audístis quia antichístus venit, ita nunc antichrísti multi adsunt, unde cognóscimus quóniam novíssima hora est. Ex nobis prodiérunt, sed non erant ex nobis, nam si fuíssent ex nobis, permansíssent nobíscum ; sed ut manifestarétur quóniam illi omnes non sunt ex nobis.
Sed vos unctiónem habétis a Sancto, et scitis omnes. Non scripsi vobis quasi nesciéntibus veritátem sed quasi sciéntibus eam, et quóniam omne mendácium ex veritáte non est.
Quis est mendax, nisi is qui negat quóniam Iesus est Christus ? Hic est antichrístus, qui negat Patrem et Fílium. Omnis, qui negat Fílium, nec Patrem habet ; qui confitétur Fílium, et Patrem habet.
Vos, quod audístis ab inítio, in vobis permáneat ; si in vobis permánserit, quod ab inítio audístis, et vos in Fílio et in Patre manébitis. Et haec est repromíssio, quam ipse pollícitus est nobis : vitam aetérnam.
Dixit Dóminus Dómino meo : «Sede a dextris meis,
donec ponam inimícos tuos scabéllum pedum tuórum».
Virgam poténtiae tuae emíttet Dóminus ex Sion :
domináre in médio inimicórum tuórum.
Tecum principátus in die virtútis tuae, in splendóribus sanctis,
ex útero ante lucíferum génui te.
Iurávit Dóminus et non paenitébit eum :
«Tu es sacérdos in aetérnum secúndum órdinem Melchísedech».
Allelúia, allelúia.
Sic lúceat lux vestra coram homínibus, ut vídeant vestra bona ópera et gloríficent Patrem vestrum.
Allelúia.
Léctio sancti Evangélii secúndum Matthaéum
In illo témpore :
Dixit Iesus discípulis suis : «Vos estis sal terrae ; quod si sal evanúerit, in quo saliétur ? Ad níhilum valet ultra, nisi ut mittátur foras et conculcétur ab homínibus.
Vos estis lux mundi. Non potest cívitas abscóndi supra montem pósita ; neque accéndunt lucérnam et ponunt eam sub módio, sed super candelábrum, ut lúceat ómnibus, qui in domo sunt. Sic lúceat lux vestra coram homínibus, ut vídeant vestra bona ópera et gloríficent Patrem vestrum, qui in caelis est.
Nolíte putáre quóniam veni sólvere Legem aut Prophétas ; non veni sólvere, sed adimplére. Amen quippe dico vobis : Donec tránseat caelum et terra, iota unum aut unus apex non praeteríbit a Lege, donec ómnia fiant. Qui ergo sólverit unum de mandátis istis mínimis et docúerit sic hómines, mínimus vocábitur in regno caelórum ; qui autem fécerit et docúerit, hic magnus vocábitur in regno caelórum».
die 17 ianuarii
In festo
sancti Antonii
Iustus ut palma florébit, sicut cedrus Líbani succréscet. Plantáti in domo Dómini, in átriis Dei nostri florébunt.
Deus, qui beáto António abbáti tribuísti mira tibi in desérto conversatióne servíre, eius nobis interventióne concéde, ut, abnegántes nosmetípsos, te iúgiter super ómnia diligámus. Per Dóminum.
Léctio Epístulae beáti Pauli apóstoli
ad Ephésios
Fratres :
Confortámini in Dómino et in poténtia virtútis eius.
Indúite armatúram Dei, ut possítis stare advérsus insídias Diáboli. Quia non est nobis colluctátio advérsus sánguinem et carnem sed advérsus principátus, advérsus potestátes, advérsus mundi rectóres tenebrárum harum, advérsus spiritália nequítiae in caeléstibus.
Proptérea accípite armatúram Dei, ut possítis resístere in die malo et, ómnibus perféctis, stare. Per omnem oratiónem et obsecratiónem orántes omni témpore in Spíritu, et in ipso vigilántes in omni instántia et obsecratióne pro ómnibus sanctis.
Consérva me, Deus, quóniam sperávi in te.
Dixi Dómino : «Dóminus meus es tu,
Dóminus pars hereditátis meae et cálicis mei :
tu es qui détines sortem meam».
Benedícam Dóminum, qui tríbuit mihi intelléctum ;
ínsuper et in nóctibus erudiérunt me renes mei.
Proponébam Dóminum in conspéctu meo semper,
quóniam a dextris est mihi, non commovébor.
Notas mihi fácies vias vitae,
plenitúdinem laetítiae cum vultu tuo,
delectatiónes in déxtera tua usque in finem.
Allelúia, allelúia.
Si manséritis in sermóne meo, vere discípuli mei estis et cognoscétis veritátem, dicit Dóminus.
Allelúia.
Léctio sancti Evangélii secúndum Matthaéum
In illo témpore :
Ecce unus accédens ait ad Iesum : «Magíster, quid boni fáciam, ut hábeam vitam aetérnam ?».
Qui dixit ei : «Quid me intérrogas de bono ? Unus est bonus. Si autem vis ad vitam íngredi, serva mandáta».
Dicit illi : «Quae?».
Iesus autem dixit : «Non homicídium fácies, non adulterábis, non fácies furtum, non falsum testimónium dices, honóra patrem et matrem tuam et díliges próximum tuum sicut teípsum».
Dicit illi aduléscens : «Omnia haec custodívi. Quid adhuc mihi deest ?».
Ait illi Iesus : «Si vis perféctus esse, vade, vende, quae habes, et da paupéribus, et habébis thesáurum in caelo ; et veni, séquere me».
Accépta tibi sint, Dómine, quaésumus, múnera nostrae servitútis, pro beáti Antónii commemoratióne altári tuo propósita, et concéde, ut, a terrénis impediméntis absolúti, te solo dívites efficiámur. Per Christum.
- Si vis perféctus esse, vade, vende, quae habes, et da paupéribus, et séquere me, dicit Dóminus.
Sacraméntis tuis, Dómine, salúbriter enutrítos, cunctas fac nos semper insídias inimíci superáre, qui beáto António dedísti contra potestátes tenebrárum claras reférre victórias. Per Christum.
die 20 ianuarii (1/2)
In festo
sancti Fabiani
Deus, tuórum glória sacerdótum, praesta, quaésumus, ut, beáti Fabiáni mártyris tui interveniénte suffrágio, eiúsdem proficiámus fídei consórtio dignóque servítio. Per Dóminum.
Léctio Epístulae prióris beáti Petri apóstoli
Caríssimi :
Senióres, qui in vobis sunt, óbsecro, consénior et testis Christi passiónum, qui et eius, quae in futúro revelánda est, glóriae communicátor : Páscite qui est in vobis, gregem Dei, providéntes non coácto sed spontánee secúndum Deum, neque turpis lucri grátia sed voluntárie, neque ut dominántes in cleris sed formae facti gregis.
Et cum apparúerit Princeps pastórum, percipiétis immarcescíbilem glóriae corónam.
Exspéctans exspectávi Dóminum,
et inténdit mihi.
Et immísit in os meum cánticum novum,
carmen Deo nostro.
Sacrifícium et oblatiónem noluísti,
aures autem fodísti mihi.
Holocáustum et pro peccáto non postulásti,
tunc dixi : «Ecce vénio.
In volúmine libri scriptum est de me.
Fácere voluntátem tuam, Deus meus, vólui ;
et lex tua in praecórdiis meis».
Annuntiávi iustítiam tuam in ecclésia magna ;
ecce lábia mea non prohibébo, Dómine, tu scisti.
Allelúia, allelúia.
Ego sum pastor bonus, dicit Dóminus : et cognósco oves meas, et cognóscunt me meae.
Allelúia.
Léctio sancti Evangélii secúndum Ioánnem
Cum manifestásset se Iesus discípulis suis et prandísset cum eis, dicit Simóni Petro : «Simon Ioánnis, díligis me plus his ?».
Dicit ei : «Etiam, Dómine, tu scis quia amo te». Dicit ei : «Pasce agnos meos».
Dicit ei íterum secúndo : «Simon Ioánnis, díligis me ?». Ait illi : «Etiam, Dómine, tu scis quia amo te». Dicit ei : «Pasce oves meas».
Dicit ei tértio : «Simon Ioánnis, amas me ?».
Contristátus est Petrus quia dixit ei tértio : «Amas me?», et dicit ei : «Dómine, tu ómnia scis, tu cognóscis quia amo te».
Dicit ei : «Pasce oves meas».
die 20 ianuarii (2/2)
In festo
sancti Sebastiani
Praesta nobis, quaésumus, Dómine, spíritum fortitúdinis, ut, glorióso exémplo beáti Sebastiáni mártyris tui edócti, tibi magis quam homínibus oboedíre discámus. Per Dóminum.
Léctio Epístulae prióris beáti Petri apóstoli
Caríssimi :
Si patímini propter iustítiam, beáti !
Timórem autem eórum ne timuéritis et non conturbémini.
Dóminum autem Christum sanctificáte in córdibus vestris, paráti semper ad defensiónem omni poscénti vos ratiónem de ea, quae in vobis est spe, sed cum mansuetúdine et timóre, consciéntiam habéntes bonam, ut in quo de vobis detrectátur, confundántur, qui calumniántur vestram bonam in Christo conversatiónem.
Mélius est enim benefaciéntes, si velit volúntas Dei, pati quam malefaciéntes.
Benedícam Dóminum in omni témpore,
semper laus eius in ore meo.
In Dómino gloriábitur ánima mea,
áudiant mansuéti et laeténtur.
Magnificáte Dóminum mecum,
et exaltémus nomen eius in idípsum.
Exquisívi Dóminum, et exaudívit me
et ex ómnibus terróribus meis erípuit me.
Respícite ad eum, et illuminámini
et fácies vestrae non confundéntur.
Iste pauper clamávit, et Dóminus exaudívit eum
et de ómnibus tribulatiónibus eius salvávit eum.
Vallábit ángelus Dómini in circúitu timéntes eum
et erípiet eos.
Gustáte et vidéte quóniam suávis est Dóminus ;
beátus vir, qui sperat in eo.
Allelúia, allelúia.
Beátus vir, qui suffert tentatiónem, quia, cum probátus fúerit, accípiet corónam vitae.
Allelúia.
Léctio sancti Evangélii secúndum Matthaéum
In illo témpore :
Dixit Iesus Apóstolis suis : «Nolíte timére eos, qui occídunt corpus, ánimam autem non possunt occídere ; sed pótius eum timéte, qui potest et ánimam et corpus pérdere in gehénna.
Nonne duo pásseres asse véneunt ? Et unus ex illis non cadet super terram sine Patre vestro. Vestri autem et capílli cápitis omnes numeráti sunt. Nolíte ergo timére ; multis passéribus melióres estis vos.
Omnis ergo qui confitébitur me coram homínibus, confitébor et ego eum coram Patre meo, qui est in caelis ; qui autem negáverit me coram homínibus, negábo et ego eum coram Patre meo, qui est in caelis».
die 21 ianuarii
In festo
sanctae Agnetis
Omnípotens sempitérne Deus, qui infírma mundi éligis ut fórtia quaeque confúndas, concéde propítius, ut, qui beátae Agnétis mártyris tuae natalícia celebrámus, eius in fide constántiam subsequámur. Per Dóminum.
Léctio Epístulae prióris beáti Pauli apóstoli
ad Corínthios
Fratres :
Vidéte vocatiónem vestram, fratres, quia non multi sapiéntes secúndum carnem, non multi poténtes, non multi nóbiles.
Sed, quae stulta sunt mundi, elégit Deus, ut confúndat sapiéntes, et infírma mundi elégit Deus, ut confúndat fórtia, et ignobília mundi et contemptibília elégit Deus, quae non sunt, ut ea, quae sunt, destrúeret, ut non gloriétur omnis caro in conspéctu Dei.
Ex ipso autem vos estis in Christo Iesu, qui factus est sapiéntia nobis a Deo et iustítia et sanctificátio et redémptio, ut quemádmodum scriptum est : «Qui gloriátur, in Dómino gloriétur».
Dóminus pascit me, et nihil mihi déerit : in páscuis viréntibus me collocávit,
super aquas quiétis edúxit me, ánimam meam refécit.
Dedúxit me super sémitas iustítiae propter nomen suum.
Nam et si ambulávero in valle umbrae mortis, non timébo mala, quóniam tu mecum es.
Virga tua et báculus tuus, ipsa me consoláta sunt.
Parásti in conspéctu meo mensam advérsus eos, qui tríbulant me ; impinguásti in óleo caput meum, et calix meus redúndat.
Etenim benígnitas et misericórdia subsequéntur me ómnibus diébus vitae meae,
et inhabitábo in domo Dómini in longitúdinem diérum.
Allelúia, allelúia.
Manéte in dilectióne mea, dicit Dóminus ; qui manet in me, et ego in eo, hic fert fructum multum.
Allelúia.
Léctio sancti Evangélii secúndum Matthaéum
Dixit Iesus turbis : «Símile est regnum caelórum thesáuro abscóndito in agro, quem qui invénit homo abscóndit, et prae gáudio illíus vadit et vendit univérsa, quae habet, et emit agrum illum.
Iterum símile est regnum caelórum hómini negotiatóri quaerénti bonas margarítas. Invénta autem una pretiósa margaríta, ábiit, et véndidit ómnia, quae hábuit, et emit eam».
Múnera, quaésumus, Dómine, quae in celebritáte beátae Agnétis deférimus, ita grátiae tuae efficiántur accépta, sicut eius tibi plácitum éxstitit passiónis certámen. Per Christum.
Vere dignum et iustum est, aequum et salutáre, nos tibi semper et ubíque grátias ágere: Dómine, sancte Pater, omnípotens aetérne Deus :
Quóniam beátae mártyris Agnétis pro confessióne nóminis tui, ad imitatiónem Christi, sanguis effúsus tua mirabília maniféstat, quibus pérficis in fragilitáte virtútem, et vires infírmas ad testimónium róboras, per Christum Dóminum nostrum.
Et ídeo, cum caelórum Virtútibus, in terris te iúgiter celebrámus, maiestáti tuae sine fine clamántes :
Sanctus…
Deus, qui beátam Agnétem pro gémina virginitátis et martýrii victória inter Sanctos coronásti, da, quaésumus, per huius virtútem sacraménti, ut, omne malum fórtiter superántes, caeléstem glóriam consequámur. Per Christum.
die 22 ianuarii
In festo
sancti Vincentii
Omnípotens sempitérne Deus, tuum in nobis Spíritum cleménter infúnde, ut corda nostra ea dilectióne válida potiántur, per quam sanctus martyr Vincéntius ómnia córporis torménta devícit. Per Dóminum.
Léctio Epístulae alteríus beáti Pauli apóstoli
ad Corínthios
Fratres :
Habémus thesáurum grátiae in vasis fictílibus, ut sublímitas sit virtútis Dei, et non ex nobis. In ómnibus tribulatiónem pátimur, sed non angustiámur ; aporiámur, sed non destitúimur ; persecutiónem pátimur, sed non derelínquimur ; deícimur, sed non perímus ; semper mortificatiónem Iesu in córpore circumferéntes, ut et vita Iesu in córpore nostro manifestétur.
Semper enim nos, qui vívimus, in mortem trádimur propter Iesum, ut et vita Iesu manifestétur in carne nostra mortáli. Ergo mors in nobis operátur, vita autem in vobis.
Habéntes autem eúndem spíritum fídei, sicut scriptum est : «Crédidi, propter quod locútus sum», et nos crédimus, propter quod et lóquimur, sciéntes quóniam, qui suscitávit Dóminum Iesum, et nos cum Iesu suscitábit et constítuet vobíscum.
Omnia enim propter vos, ut grátia abúndans per multos gratiárum actiónem abundáre fáciat in glóriam Dei.
Benedícam Dóminum in omni témpore,
semper laus eius in ore meo.
In Dómino gloriábitur ánima mea,
áudiant mansuéti et laeténtur.
Magnificáte Dóminum mecum,
et exaltémus nomen eius in idípsum.
Exquisívi Dóminum, et exaudívit me
et ex ómnibus terróribus meis erípuit me.
Respícite ad eum, et illuminámini
et fácies vestrae non confundéntur.
Iste pauper clamávit, et Dóminus exaudívit eum
et de ómnibus tribulatiónibus eius salvávit eum.
Vallábit ángelus Dómini in circúitu timéntes eum
et erípiet eos.
Gustáte et vidéte quóniam suávis est Dóminus ;
beátus vir, qui sperat in eo.
Allelúia, allelúia.
Beáti, qui persecutiónem patiúntur propter iustítiam, quóniam ipsórum est regnum caelórum.
Allelúia.
Léctio sancti Evangélii secúndum Matthaéum
In illo témpore :
Dixit Iesus Apóstolis suis : «Cavéte ab homínibus ; tradent enim vos in concíliis, et in synagógis suis flagellábunt vos ; et ad praésides et ad reges ducémini propter me in testimónium illis et géntibus.
Cum autem tradent vos, nolíte cogitáre quómodo aut quid loquámini ; dábitur enim vobis in illa hora quid loquámini.
Non enim vos estis, qui loquímini, sed Spíritus Patris vestri, qui lóquitur in vobis.
Tradet autem frater fratrem in mortem, et pater fílium ; et insúrgent fílii in paréntes et morte eos affícient. Et éritis ódio ómnibus propter nomen meum ; qui autem perseveráverit in finem, hic salvus erit».
die 24 ianuarii
In festo
sancti Francisci de Sales
Deus, qui ad animárum salútem beátum Francíscum epíscopum ómnibus ómnia factum esse voluísti, concéde propítius, ut, eius exémplo, tuae mansuetúdinem caritátis in fratrum servítio semper ostendámus. Per Dóminum.
Léctio Epístulae beáti Pauli apóstoli
ad Ephésios
Fratres :
Mihi ómnium sanctórum mínimo data est grátia haec : géntibus evangelizáre investigábiles divítias Christi et illumináre omnes, quae sit dispensátio mystérii abscónditi a saéculis in Deo, qui ómnia creávit, ut innotéscat nunc principátibus et potestátibus in caeléstibus per ecclésiam multifórmis sapiéntia Dei secúndum propósitum saeculórum, quod fecit in Christo Iesu Dómino nostro, in quo habémus fidúciam et accéssum in confidéntia per fidem eius.
Spera in Dómino et fac bonitátem,
et inhabitábis terram et pascéris in fide.
Delectáre in Dómino,
et dabit tibi petitiónes cordis tui.
Commítte Dómino viam tuam et spera in eo,
et ipse fáciet ;
et edúcet quasi lumen iustítiam tuam
et iudícium tuum tamquam merídiem.
Os iusti meditábitur sapiéntiam,
et lingua eius loquétur iudícium ;
lex Dei eius in corde ipsíus,
et non vacillábunt gressus eius.
Allelúia, allelúia.
Mandátum novum do vobis, dicit Dóminus, ut diligátis ínvicem ; sicut diléxi vos, ut et vos diligátis ínvicem.
Allelúia.
Léctio sancti Evangélii secúndum Ioánnem
In illo témpore :
Dixit Iesus discípulis suis :
«Sicut diléxit me Pater, et ego diléxi vos ; manéte in dilectióne mea. Si praecépta mea servavéritis, manébitis in dilectióne mea, sicut ego Patris mei praecépta servávi et máneo in eius dilectióne. Haec locútus sum vobis, ut gáudium meum in vobis sit, et gáudium vestrum impleátur.
Hoc est praecéptum meum, ut diligátis ínvicem, sicut diléxi vos ; maiórem hac dilectiónem nemo habet, ut ánimam suam quis ponat pro amícis suis.
Vos amíci mei estis, si fecéritis, quae ego praecípio vobis. Iam non dico vos servos, quia servus nescit quid facit dóminus eius ; vos autem dixi amícos, quia ómnia, quae audívi a Patre meo, nota feci vobis.
Non vos me elegístis, sed ego elégi vos et pósui vos, ut vos eátis et fructum afferátis, et fructus vester máneat, ut quodcúmque petiéritis Patrem in nómine meo, det vobis.
Haec mando vobis, ut diligátis ínvicem».
Per hanc salutárem hóstiam quam offérimus tibi, Dómine, cor nostrum divíno illo Sancti Spíritus igne succénde, quo mitíssimum beáti Francísci ánimum mirabíliter inflammásti. Per Christum.
Concéde, quaésumus, omnípotens Deus, ut, per sacraménta quae súmpsimus, beáti Francísci caritátem et mansuetúdinem imitántes in terris, glóriam quoque consequámur in caelis. Per Christum.
die 25 ianuarii
In Conversione
sancti Pauli
Scio cui crédidi, et certus sum quia potens est depósitum meum serváre in illum diem, iustus iudex.
Deus, qui univérsum mundum beáti Pauli apóstoli praedicatióne docuísti, da nobis, quaésumus, ut, cuius conversiónem hódie celebrámus, per eius ad te exémpla gradiéntes, tuae simus mundo testes veritátis. Per Dóminum.
Ad libitum :
Léctio Actuum Apostolórum
In diébus illis : Dixit Paulus ad pópulum :
«Ego sum vir Iudaéus, natus Tarso Cilíciae, enutrítus autem in ista civitáte, secus pedes Gamáliel erudítus iuxta veritátem patérnae legis, aemulátor Dei sicut et vos omnes estis hódie. Qui hanc viam persecútus sum usque ad mortem, álligans et tradens in custódias viros ac mulíeres, sicut et princeps sacerdótum testimónium mihi reddit et omne concílium ; a quibus et epístulas accípiens ad fratres, Damáscum pergébam, ut addúcerem et eos, qui ibi essent, vinctos in Ierúsalem, ut puniréntur.
Factum est autem eunte me et appropinquánte Damásco, circa médiam diem súbito de caelo circumfúlsit me lux copiósa, et décidi in terram et audívi vocem dicéntem mihi : “Saul, Saul, quid me perséqueris ?”.
Ego autem respóndi : “Quis es, Dómine?”.
Dixítque ad me : “Ego sum Iesus Nazarénus, quem tu perséqueris”.
Et qui mecum erant, lumen quidem vidérunt, vocem autem non audiérunt eius, qui loquebátur mecum.
Et dixi : “Quid fáciam, Dómine ?”.
Dóminus autem dixit ad me : “Surgens vade Damáscum, et ibi tibi dicétur de ómnibus, quae statútum est tibi, ut fáceres”.
Et cum non vidérem prae claritáte lúminis illíus, ad manum dedúctus a comítibus veni Damáscum.
Ananías autem quidam vir religiósus secúndum legem testimónium habens ab ómnibus habitántibus Iudaéis, véniens ad me et astans dixit mihi : “Saul frater, réspice !”. Et ego eádem hora respéxi in eum.
At ille dixit : “Deus patrum nostrórum praeordinávit te, ut cognósceres voluntátem eius, et vidéres Iustum et audíres vocem ex ore eius, quia eris testis illi ad omnes hómines eórum, quae vidísti et audísti. Et nunc quid moráris ? Exsúrgens baptizáre et áblue peccáta tua, invocáto nómine ipsíus”».
Léctio Actuum Apostolórum
In diébus illis :
Saulus adhuc spirans minárum et caedis in discípulos Dómini, accéssit ad príncipem sacerdótum et pétiit ab eo epístulas in Damáscum ad synagógas, ut si quos invenísset huius viae, viros ac mulíeres, vinctos perdúceret in Ierúsalem.
Et cum iter fáceret, cóntigit ut appropinquáret Damásco, et súbito circumfúlsit eum lux de caelo, et cadens in terram audívit vocem dicéntem sibi : «Saul, Saul, quid me perséqueris ?».
Qui dixit : «Quis es, Dómine ?».
Et ille : «Ego sum Iesus, quem tu perséqueris ! Sed surge et ingrédere civitátem, et dicétur tibi quid te opórteat fácere».
Viri autem illi, qui comitabántur cum eo, stabant stupefácti, audiéntes quidem vocem, néminem autem vidéntes. Surréxit autem Saulus de terra apertísque óculis nihil vidébat ; ad manus autem illum trahéntes introduxérunt Damáscum. Et erat tribus diébus non videns et non manducávit neque bibit.
Erat autem quidam discípulus Damásci nómine Ananías, et dixit ad illum in visu Dóminus : «Ananía».
At ille ait : «Ecce ego, Dómine».
Et Dóminus ad illum : «Surgens vade in vicum, qui vocátur Rectus, et quaere in domo Iudae Saulum nómine Tarsénsem ; ecce enim orat et vidit virum Ananíam nómine introeúntem et imponéntem sibi manus, ut visum recípiat».
Respóndit autem Ananías : «Dómine, audívi a multis de viro hoc, quanta mala sanctis tuis fécerit in Ierúsalem ; et hic habet potestátem a princípibus sacerdótum alligándi omnes, qui ínvocant nomen tuum».
Dixit autem ad eum Dóminus : «Vade, quóniam vas electiónis est mihi iste, ut portet nomen meum coram géntibus et régibus et fíliis Israel ; ego enim osténdam illi, quanta opórteat eum pro nómine meo pati».
Et ábiit Ananías et introívit in domum et impónens ei manus dixit : «Saul frater, Dóminus misit me, Iesus qui appáruit tibi in via, qua veniébas, ut vídeas et impleáris Spíritu Sancto». Et conféstim cecidérunt ab óculis eius tamquam squamae, et visum recépit. Et surgens baptizátus est et, cum accepísset cibum, confortátus est.
Fuit autem cum discípulis, qui erant Damásci, per dies áliquot et contínuo in synagógis praedicábat Iesum, quóniam hic est Fílius Dei.
Stupébant autem omnes qui audiébant et dicébant : «Nonne hic est, qui expugnábat in Ierúsalem eos, qui invocábant nomen istud, et huc ad hoc vénerat, ut vinctos illos dúceret ad príncipes sacerdótum ?». Saulus autem magis convalescébat et confundébat Iudaéos, qui habitábant Damásci, affírmans quóniam hic est Christus.
Laudáte Dóminum, omnes gentes,
collaudáte eum, omnes pópuli.
Quóniam confirmáta est super nos misericórdia eius,
et véritas Dómini manet in aetérnum.
Allelúia, allelúia.
Ego elégi vos, ut vos eátis et fructum afferátis, et fructus vester máneat, dicit Dóminus.
Allelúia.
Léctio sancti Evangélii secúndum Marcum
In illo témpore : Appárens Iesus úndecim, dixit eis :
«Eúntes in mundum univérsum praedicáte evangélium omni creatúrae. Qui credíderit et baptizátus fúerit, salvus erit ; qui vero non credíderit, condemnábitur.
Signa autem eos, qui credíderint, haec sequéntur : in nómine meo daemónia eícient, linguis loquéntur novis, serpéntes tollent, et, si mortíferum quid bíberint, non eos nocébit, super aegrótos manus impónent et bene habébunt».
Illo nos, quaésumus, Dómine, divína tractántes, fídei lúmine Spíritus perfúndat, quo beátum Paulum apóstolum ad glóriae tuae propagatiónem iúgiter collustrávit. Per Christum.
Vere dignum et iustum est, aequum et salutáre, nos tibi semper et ubíque grátias ágere : Dómine, sancte Pater, omnípotens aetérne Deus : per Christum Dóminum nostrum.
Quóniam Ecclésiam tuam in apostólicis tribuísti consístere fundaméntis, ut signum sanctitátis tuae in terris manéret ipsa perpétuum, et caeléstia praebéret cunctis homínibus documénta.
Quaprópter nunc et usque in saéculum cum omni milítia Angelórum devóta tibi mente concínimus, clamántes atque dicéntes :
Sanctus…
- In fide vivo Fílii Dei, qui diléxit me et trádidit seípsum pro me.
Sacraménta quae súmpsimus, Dómine Deus noster, in nobis fóveant caritátis ardórem, quo beátus apóstolus Paulus veheménter accénsus, ómnium pértulit sollicitúdinem Ecclesiárum. Per Christum.
die 26 ianuarii
In festo
sanctorum Timothei et Titi
Deus, qui beátos Timótheum et Titum apostólicis virtútibus decorásti, utriúsque intercessióne concéde, ut, iuste et pie vivéntes in hoc saéculo, ad caeléstem mereámur pátriam perveníre. Per Dóminum.
Ad libitum
Léctio Epístulae alteríus beáti Pauli apóstoli
ad Timótheum
Paulus, apóstolus Christi Iesu per voluntátem Dei secúndum promissiónem vitae, quae est in Christo Iesu, Timótheo caríssimo fílio : grátia, misericórdia, pax a Deo Patre et Christo Iesu Dómino nostro.
Grátias ago Deo, cui sérvio a progenitóribus in consciéntia pura, quod sine intermissióne hábeo tui memóriam in oratiónibus meis nocte ac die, desíderans te vidére, memor lacrimárum tuárum, ut gáudio ímplear, recordatiónem accípiens eius fídei, quae est in te non ficta, quae et habitávit primum in ávia tua Lóide et matre tua Euníce, certus sum autem quod et in te.
Propter quam causam admóneo te ut resúscites donatiónem Dei, quae est in te per impositiónem mánuum meárum ; non enim dedit nobis Deus Spíritum timóris sed virtútis et dilectiónis et sobrietátis. Noli ítaque erubéscere testimónium Dómini nostri neque me vinctum eius, sed collábora evangélio secúndum virtútem Dei.
Léctio Epístulae beáti Pauli apóstoli
ad Titum
Paulus, servus Dei, apóstolus autem Iesu Christi secúndum fidem electórum Dei et agnitiónem veritátis, quae secúndum pietátem est in spem vitae aetérnae, quam promísit, qui non mentítur, Deus ante témpora saeculária, manifestávit autem tempóribus suis verbum suum in praedicatióne, quae crédita est mihi secúndum praecéptum salvatóris nostri Dei, Tito germáno fílio secúndum commúnem fidem : grátia et pax a Deo Patre et Christo Iesu salvatóre nostro.
Huius rei grátia relíqui te Cretae, ut ea, quae desunt, córrigas et constítuas per civitátes presbýteros, sicut ego tibi dispósui.
Cantáte Dómino cánticum novum,
cantáte Dómino, omnis terra.
Cantáte Dómino, benedícite nómini eius,
annuntiáte de die in diem salutáre eius.
Annuntiáte inter gentes glóriam eius,
in ómnibus pópulis mirabília eius.
Afférte Dómino, famíliae populórum,
afférte Dómino glóriam et poténtiam,
afférte Dómino glóriam nóminis eius.
Dícite in géntibus : «Dóminus regnávit !».
Etenim corréxit orbem terrae, qui non commovébitur ;
iudicábit pópulos in aequitáte.
Allelúia, allelúia.
Evangelizáre paupéribus misit me Dóminus, praedicáre captívis remissiónem.
Allelúia.
Léctio sancti Evangélii secúndum Lucam
In illo témpore :
Designávit Dóminus álios septuagínta duos et misit illos binos ante fáciem suam in omnem civitátem et locum, quo erat ipse ventúrus.
Et dicébat illis : «Messis quidem multa, operárii autem pauci ; rogáte ergo Dóminum messis, ut mittat operários in messem suam. Ite ; ecce ego mitto vos sicut agnos inter lupos. Nolíte portáre sácculum, neque peram neque calceaménta, et néminem per viam salutavéritis.
In quamcúmque domum intravéritis, primum dícite : “Pax huic dómui”. Et si ibi fúerit fílius pacis, requiéscet super illum pax vestra ; sin autem, ad vos revertétur.
In eádem autem domo manéte edéntes et bibéntes, quae apud illos sunt : dignus enim est operárius mercéde sua.
Nolíte transíre de domo in domum. Et in quamcúmque civitátem intravéritis, et suscéperint vos, manducáte, quae apponúntur vobis, et curáte infírmos, qui in illa sunt, et dícite illis : “Appropinquávit in vos regnum Dei”».
die 27 ianuarii
In festo
sanctae Angelae Merici
Pietáti tuae, quaésumus, Dómine, nos beáta virgo Angela commendáre non désinat, ut, eius caritátis et prudéntiae documénta sectántes, tuam valeámus doctrínam custodíre et móribus profitéri. Per Dóminum.
Léctio Epístulae prióris beáti Petri apóstoli
Caríssimi :
Estóte prudéntes et vigiláte in oratiónibus.
Ante ómnia mútuam in vobismetípsos caritátem contínuam habéntes, quia cáritas óperit multitúdinem peccatórum ; hospitáles ínvicem sine murmuratióne ; unusquísque, sicut accépit donatiónem, in altérutrum illam administrántes sicut boni dispensatóres multifórmis grátiae Dei.
Si quis lóquitur, quasi sermónes Dei ; si quis minístrat, tamquam ex virtúte, quam largítur Deus, ut in ómnibus honorificétur Deus per Iesum Christum : cui est glória et impérium in saécula saeculórum. Amen.
Laudáte Dóminum de caelis,
laudáte eum in excélsis.
Laudáte eum, omnes ángeli eius,
laudáte eum, omnes virtútes eius .
Reges terrae et omnes pópuli,
príncipes et omnes iúdices terrae,
iúvenes et vírgines,
senes cum iunióribus
laudent nomen Dómini.
Magnificéntia eius super caelum et terram,
et exaltávit cornu pópuli sui.
Hymnus ómnibus sanctis eius,
fíliis Israel, pópulo, qui propínquus est ei.
Allelúia, allelúia.
Confíteor tibi, Pater, Dómine caeli et terrae, quia mystéria regni párvulis revelásti.
Allelúia.
Léctio sancti Evangélii secúndum Marcum
In illo témpore : Discípuli Iesu inter se in via disputavérant, quis esset maior.
Et résidens vocávit Duódecim et ait illis : «Si quis vult primus esse, erit ómnium novíssimus et ómnium miníster».
Et accípiens púerum, státuit eum in médio eórum ; quem ut compléxus esset, ait illis : «Quisquis unum ex huiúsmodi púeris recéperit in nómine meo, me récipit ; et, quicúmque me suscéperit, non me súscipit, sed eum qui me misit».
die 28 ianuarii
In festo
sancti Thomae de Aquino
Deus, qui beátum Thomam sanctitátis zelo ac sacrae doctrínae stúdio conspícuum effecísti, da nobis, quaésumus, et quae dócuit intelléctu conspícere, et quae gessit imitatióne complére. Per Dóminum.
Léctio libri Sapiéntiae
Optávi, et datus est mihi sensus ; et invocávi, et venit in me spíritus sapiéntiae. Praepósui illam regnis et sédibus et divítias nihil esse duxi in comparatióne illíus ; nec comparávi illi lápidem pretiósum, quóniam omne aurum in comparatióne illíus aréna est exígua, et tamquam lutum aestimábitur argéntum in conspéctu illíus.
Super salútem et spéciem diléxi illam et propósui pro luce habére illam, quóniam inexstinguíbile est lumen illíus.
Mihi autem det Deus dícere secúndum senténtiam et sentíre digna horum, quae mihi data sunt, quóniam ipse sapiéntiae dux est et sapiéntium emendátor ; in manu enim illíus et nos et sermónes nostri et omnis sapiéntia et óperum sciéntia.
In quo mundábit adulescéntior viam suam ?
In custodiéndo sermónes tuos.
In toto corde meo exquisívi te,
ne erráre me fácias a praecéptis tuis.
In corde meo abscóndi elóquia tua,
ut non peccem tibi.
Benedíctus es, Dómine ;
doce me iustificatiónes tuas.
In lábiis meis
numerávi ómnia iudícia oris tui.
In via testimoniórum tuórum delectátus sum
sicut in ómnibus divítiis.
Allelúia, allelúia.
Unus est Pater vester, caeléstis ; et magíster vester unus est, Christus.
Allelúia.
Léctio sancti Evangélii secúndum Matthaéum
In illo témpore :
Dixit Iesus ad discípulos suos : «Vos nolíte vocári Rabbi ; unus enim est Magíster vester, omnes autem vos fratres estis.
Et Patrem nolíte vocáre vobis super terram, unus enim est Pater vester, caeléstis.
Nec vocémini Magístri ; quia Magíster vester unus est, Christus.
Qui maior est vestrum, erit miníster vester.
Qui autem se exaltáverit, humiliábitur ; et, qui se humiliáverit, exaltábitur».
die 31 ianuarii
In festo
sancti Ioannis Bosco
Deus, qui adulescéntium patrem et magístrum beátum Ioánnem presbýterum excitásti, concéde, quaésumus, ut, eódem caritátis igne succénsi, ánimas quaérere tibíque soli servíre valeámus. Per Dóminum.
Léctio Epístulae beáti Pauli apóstoli
ad Philippénses
Fratres :
Gaudéte in Dómino semper. Iterum dico : Gaudéte ! Modéstia vestra nota sit ómnibus homínibus. Dóminus prope.
Nihil sollíciti sitis, sed in omni oratióne et obsecratióne cum gratiárum actióne, petitiónes vestrae innotéscant apud Deum. Et pax Dei, quae exsúperat omnem sensum, custódiet corda vestra et intellegéntias vestras in Christo Iesu.
De cétero, fratres, quaecúmque sunt vera, quaecúmque pudíca, quaecúmque iusta, quaecúmque casta, quaecúmque amabília, quaecúmque bonae famae, si qua virtus et si qua laus, haec cogitáte.
Quae et didicístis et accepístis et audístis et vidístis in me, haec ágite ; et Deus pacis erit vobíscum.
Beátus vir, qui timet Dóminum,
in mandátis eius cupit nimis.
Potens in terra erit semen eius,
generátio rectórum benedicétur.
Glória et divítiae in domo eius,
et iustítia eius manet in saéculum saéculi.
Exórtum est in ténebris lumen rectis,
miséricors et miserátor et iustus.
Iucúndus homo, qui miserétur et cómmodat,
dispónet res suas in iudício,
quia in aetérnum non commovébitur.
In memória aetérna erit iustus,
ab auditióne mala non timébit.
Parátum cor eius, sperans in Dómino,
confirmátum est cor eius, non timébit,
donec despíciat inimícos suos.
Distríbuit, dedit paupéribus ;
iustítia eius manet in saéculum saéculi,
cornu eius exaltábitur in glória.
Allelúia, allelúia.
Qui maior est vestrum, erit miníster vester, dicit Dóminus ; qui autem se humiliáverit, exaltábitur.
Allelúia.
Léctio sancti Evangélii secúndum Matthaéum
In illa hora accessérunt discípuli ad Iesum dicéntes : «Quis putas maior est in regno caelórum ?». Et ádvocans Iesus párvulum, státuit eum in médio eórum et dixit :
«Amen dico vobis : Nisi convérsi fuéritis et efficiámini sicut párvuli, non intrábitis in regnum caelórum. Quicúmque ergo humiliáverit se sicut párvulus iste, hic est maior in regno caelórum. Et, qui suscéperit unum párvulum talem in nómine meo, me súscipit».