die 1 ianuarii
In sollemnitate Mariae Genetricis Dei
Salve, sancta Parens, eníxa puérpera Regem, qui caelum terrámque regit in saécula saeculórum.
Deus, qui salútis aetérnae, beátae Maríae virginitáte fecúnda humáno géneri praémia praestitísti, tríbue, quaésumus, ut ipsam pro nobis intercédere sentiámus, per quam merúimus Fílium tuum auctórem vitae suscípere. Qui tecum vivit.
Léctio libri Númeri
Locútus est Dóminus ad Móysen dicens :
«Lóquere Aaron et fíliis eius : Sic benedicétis fíliis Israel et dicétis eis :
“Benedícat tibi Dóminus et custódiat te !
Illúminet Dóminus fáciem suam super te et misereátur tui !
Convértat Dóminus vultum suum ad te et det tibi pacem !”.
Invocabúntque nomen meum super fílios Israel, et ego benedícam eis».
Psalmus
Deus misereátur nostri et benedícat nobis ; illúminet vultum suum super nos,
Ut cognoscátur in terra via tua, in ómnibus géntibus salutáre tuum.
Laeténtur et exsúltent gentes, quóniam iúdicas pópulos in aequitáte et gentes in terra dírigis.
Confiteántur tibi pópuli, Deus ; confiteántur tibi pópuli omnes.
Benedícat nos Deus, et métuant eum omnes fines terrae.
Léctio Epístulae beáti Pauli apóstoli ad Gálatas
Fratres :
Ubi venit plenitúdo témporis, misit Deus Fílium suum, factum ex mulíere, factum sub lege, ut eos, qui sub lege erant, redímeret, ut adoptiónem filiórum reciperémus.
Quóniam autem estis fílii, misit Deus Spíritum Fílii sui in corda nostra clamántem : «Abba, Pater !». Itaque iam non es servus sed fílius ; quod si fílius, et heres per Deum.
Allelúia, allelúia.
Multifáriam et multis modis olim Deus locútus pátribus in prophétis, in novíssimis his diébus locútus est nobis in Fílio.
Allelúia.
Léctio sancti Evangélii secúndum Lucam
Pastóres venérunt festinántes et invenérunt Maríam et Ioseph et infántem pósitum in praesépio. Vidéntes autem notum fecérunt verbum, quod dictum erat illis de púero hoc. Et omnes, qui audiérunt, miráti sunt de his, quae dicta erant a pastóribus ad ipsos. María autem conservábat ómnia verba haec cónferens in corde suo.
Et revérsi sunt pastóres glorificántes et laudántes Deum in ómnibus, quae audíerant et víderant, sicut dictum est ad illos.
Et postquam consummáti sunt dies octo, ut circumciderétur, vocátum est nomen eius Iesus, quod vocátum est ab ángelo, priúsquam in útero conciperétur.
Deus, qui bona cuncta ínchoas benígnus et pérficis, da nobis, de sollemnitáte sanctae Dei Genetrícis laetántibus, sicut de inítiis tuae grátiae gloriámur, ita de perfectióne gaudére. Per Christum.
Vere dignum et iustum est, aequum et salutáre, nos tibi semper et ubíque grátias ágere : Dómine, sancte Pater, omnípotens aetérne Deus :
Et te in maternitáte beátae Maríae semper Vírginis collaudáre, benedícere et praedicáre.
Quae et Unigénitum tuum Sancti Spíritus obumbratióne concépit, et, virginitátis glória permanénte, lumen aetérnum mundo effúdit, Iesum Christum Dóminum nostrum.
Per quem maiestátem tuam laudant Angeli, adórant Dominatiónes, tremunt Potestátes. Caeli caelorúmque Virtútes, ac beáta Séraphim, sócia exsultatióne concélebrant.
Cum quibus et nostras voces ut admítti iúbeas, deprecámur, súpplici confessióne dicéntes :
Sanctus…
Te ígitur…
Meménto…
Communicántes, et diem sacratíssimum celebrántes, quo beátae Maríae intemeráta virgínitas huic mundo édidit Salvatórem : sed et memóriam venerántes, in primis eiúsdem gloriósae semper Vírginis Maríae, Genetrícis eiúsdem Dei et Dómini nostri Iesu Christi : …
- Iesus Christus heri et hódie idem, et in saécula !
Súmpsimus, Dómine, laeti sacraménta caeléstia : praesta, quaésumus, ut ad vitam nobis profíciant sempitérnam, qui beátam semper Vírginem Maríam Fílii tui Genetrícem et Ecclésiae Matrem profitéri gloriámur. Per Christum.
Dominica altera post Nativitatem
Cum quiétum siléntium continérent ómnia, et nox in suo cursu médium iter habéret, omnípotens sermo tuus, Dómine, de caelo a regálibus sédibus prosilívit.
Omnípotens sempitérne Deus, fidélium splendor animárum, dignáre mundum glória tua implére benígnus, et cunctis pópulis appáre per tui lúminis claritátem. Per Dóminum.
Léctio libri Ecclesiástici
Sapiéntia laudábit ánimam suam et in Deo honorábitur et in médio pópuli sui gloriábitur et in ecclésia Altíssimi apériet os suum et in conspéctu virtútis illíus gloriábitur et in médio pópuli sui exaltábitur et in plenitúdine sancta admirábitur et in multitúdine electórum habébit laudem et inter benedíctos benedicétur dicens :
«Ego ex ore Altíssimi prodívi, primogénita ante omnem creatúram».
Tunc praecépit et dixit mihi Creátor ómnium et, qui creávit me, quiétem dedit tabernáculo meo et dixit mihi : «In Iacob inhábita et in Israel hereditáre et in eléctis meis mitte radíces».
Ab inítio ante saécula creáta sum et usque ad futúrum saéculum non désinam. Et in tabernáculo sancto coram ipso ministrávi, et sic in Sion firmáta sum et in civitáte simíliter dilécta requiévi, et in Ierúsalem potéstas mea. Et radicávi in pópulo honorificáto et in parte Dómini, in hereditáte illíus, et in plenitúdine sanctórum deténtio mea.
Psalmus
Lauda, Ierúsalem, Dóminum ; colláuda Deum tuum, Sion.
Quóniam confortávit seras portárum tuárum, benedíxit fíliis tuis in te.
Qui ponit fines tuos pacem et ádipe fruménti sátiat te.
Qui emíttit elóquium suum terrae, velóciter currit verbum eius.
Qui annúntiat verbum suum Iacob, iustítias et iudícia sua Israel.
Non fecit táliter omni natióni, et iudícia sua non manifestávit eis.
Léctio Epístulae beáti Pauli apóstoli ad Ephésios
Benedíctus Deus et Pater Dómini nostri Iesu Christi, qui benedíxit nos in omni benedictióne spiritáli in caeléstibus in Christo, sicut elégit nos in ipso ante mundi constitutiónem,
ut essémus sancti et immaculáti in conspéctu eius in caritáte, qui praedestinávit nos in adoptiónem filiórum per Iesum Christum in ipsum, secúndum beneplácitum voluntátis suae, in laudem glóriae grátiae suae, in qua gratificávit nos in Dilécto.
Proptérea et ego áudiens fidem vestram, quae est in Dómino Iesu, et dilectiónem in omnes sanctos, non cesso grátias agens pro vobis memóriam faciens in oratiónibus meis, ut Deus Dómini nostri Iesu Christi, Pater glóriae, det vobis Spíritum sapiéntiae et revelatiónis in agnitióne eius, illuminátos óculos cordis vestri, ut sciátis quae sit spes vocatiónis eius, quae divítiae glóriae hereditátis eius in sanctis.
Allelúia, allelúia.
Glória tibi, Christe, praedicáto géntibus ; glória tibi, Christe, crédito in mundo.
Allelúia.
Léctio sancti Evangélii secundum Ioánnem
In princípio erat Verbum, et Verbum erat apud Deum, et Deus erat Verbum. Hoc erat in princípio apud Deum. Omnia per ipsum facta sunt, et sine ipso factum est nihil, quod factum est ; in ipso vita erat, et vita erat lux hóminum, et lux in ténebris lucet, et ténebrae eam non comprehendérunt.
Fuit homo missus à Deo, cui nomen erat Ioánnes ; hic venit in testimónium, ut testimónium perhibéret de lúmine, ut omnes créderent per illum. Non erat ille lux, sed ut testimónium perhibéret de lúmine.
Erat lux vera, quae illúminat omnem hóminem, véniens in mundum. In mundo erat, et mundus per ipsum factus est, et mundus eum non cognóvit. In própria venit, et sui eum non recepérunt.
Quotquot autem accepérunt eum, dedit eis potestátem fílios Dei fíeri, his, qui credunt in nómine eius, qui non ex sanguínibus neque ex voluntáte carnis neque ex voluntáte viri, sed ex Deo nati sunt.
Et Verbum caro factum est et habitávit in nobis ; et vídimus glóriam eius, glóriam quasi Unigéniti a Patre, plenum grátiae et veritátis.
Ioánnes testimónium pérhibet de ipso et clamat dicens : «Hic erat, quem dixi : Qui post me ventúrus est, ante me factus est, quia prior me erat».
Et de plenitúdine eius nos omnes accépimus, et grátiam pro grátia ; quia lex per Móysen data est, grátia et véritas per Iesum Christum facta est. Deum nemo vidit umquam ; unigénitus Deus, qui est in sinu Patris, ipse enarrávit.
Obláta, Dómine, múnera Unigéniti tui nativitáte sanctífica, qua nobis et via osténditur veritátis, et regni caeléstis vita promíttitur. Per Christum.
Vere dignum et iustum est, aequum et salutáre, nos tibi semper et ubíque grátias ágere : Dómine, sancte Pater, omnípotens aetérne Deus : per Christum Dóminum nostrum.
Per quem hódie commércium nostrae reparátiónis effúlsit, quia, dum nostra fragílitas a tuo Verbo suscípitur, humána mortálitas non solum in perpétuum transit honórem, sed nos quoque, mirándo consórtio, reddit aetérnos.
Et ídeo, choris angélicis sociáti, te laudámus in gáudio confiténtes :
Sanctus…
- Quotquot accepérunt eum, dedit eis potestátem fílios Dei fíeri.
Dómine Deus noster, supplíciter te rogámus, ut, huius operatióne mystérii, vítia nostra purgéntur, et iusta desidéria compleántur. Per Christum.
Die 2 ianuarii
(si non fit memoria sanctorum Basilii et Gregorii)
Dies sanctificátus illúxit nobis : veníte, gentes, et adoráte Dóminum, quia descéndit lux magna super terram.
Da, quaésumus, Dómine, pópulo tuo inviolábilem fídei firmitátem, ut, qui Unigénitum tuum in tua tecum glória sempitérnum in veritáte nostri córporis natum de Matre Vírgine confiténtur, et a praeséntibus liberéntur advérsis, et mansúris gáudiis inserántur. Per Dóminum.
Léctio Epístulae primae beáti Ioánnis apóstoli
Quis est mendax, nisi is qui negat quóniam Iesus est Christus ? Hic est antichristus, qui negat Patrem et Fílium. Omnis, qui negat Fílium, nec Patrem habet ; qui confitétur Fílium, et Patrem habet.
Vos, quod audístis ab inítio, in vobis permáneat ; si in vobis permánserit, quod ab inítio audístis, et vos in Fílio et in Patre manébitis. Et haec est repromíssio, quam ipse pollicítus est nobis : vitam aetérnam.
Haec scripsi vobis de eis, qui sedúcunt vos. Et vos unctiónem, quam accepístis ab eo, manet in vobis, et non necésse habétis, ut áliquis dóceat vos ; sed sicut únctio ipsíus docet vos de ómnibus, et verum est et non est mendácium, et, sicut dócuit vos, manétis in eo. Et nunc, filíoli, manéte in eo, ut, cum apparúerit, habeámus fidúciam et non confundámur ab eo in advéntu eius. Si scitis quóniam iustus est, scitóte quóniam et omnis, qui facit iustítiam, ex ipso natus est.
Psalmus
Cantáte Dómino cánticum novum, quia mirabília fecit.
Salvávit sibi déxtera eius, et bráchium sanctum eius.
Notum fecit Dóminus salutáre suum, in conspéctu géntium revelávit iustítiam suam.
Recordátus est misericórdiae suae et veritátis suae dómui Israel.
Vidérunt omnes términi terrae salutáre Dei nostri.
Iubiláte Deo, omnis terra, erúmpite, exsultáte et psállite.
Allelúia, allelúia.
Multifáriam et multis modis olim Deus locútus pátribus in prophétis, in novíssimis his diébus locútus est nobis in Fílio.
Allelúia.
Léctio sancti Evangélii secundum Ioánnem
Hoc est testimónium Ioánnis, quando misérunt ad eum Iudaéi ab Hierosólymis sacerdótes et Levítas, ut interrogárent eum : «Tu quis es ?».
Et conféssus est et non negávit ; et conféssus est : «Non sum ego Christus».
Et interrogavérunt eum : «Quid ergo ? Elías es tu?».
Et dicit : «Non sum».
«Prophéta es tu ?».
Et respóndit : «Non».
Dixérunt ergo ei : «Quis es ? Ut respónsum demus his, qui misérunt nos. Quid dicis de teípso ?».
Ait :
«Ego vox clamántis in desérto : “Dirígite viam Dómini”, sicut dixit Isaías prophéta».
Et qui missi fúerant, erant ex pharisaéis ; et interrogavérunt eum et dixérunt ei : «Quid ergo baptízas, si tu non es Christus neque Elías neque prophéta ?».
Respóndit eis Ioánnes dicens : «Ego baptízo in aqua ; médius vestrum stat, quem vos non scitis, qui post me ventúrus est, cuius ego non sum dignus, ut solvam eius corrígiam calceaménti».
Haec in Bethánia facta sunt trans Iordánem, ubi erat Ioánnes baptízans.
Súscipe, Dómine, múnera nostra, quibus exercéntur commércia gloriósa, ut, offeréntes quae dedísti, teípsum mereámur accípere. Per Christum.
Vere dignum et iustum est, aequum et salutáre, nos tibi semper et ubíque grátias ágere : Dómine, sancte Pater, omnípotens aetérne Deus : per Christum Dóminum nostrum.
Per quem hódie commércium nostrae reparatiónis effúlsit, quia, dum nostra fragílitas a tuo Verbo suscípitur, humána mortálitas non solum in perpétuum transit honórem, sed nos quoque, mirándo consórtio, reddit aetérnos.
Et ídeo, choris angélicis sociáti, te laudámus in gáudio confiténtes :
Sanctus…
- Vídimus glóriam eius, glóriam quasi Unigéniti a Patre, plenum grátiae et veritátis.
Da, quaésumus, omnípotens Deus, ut, mysteriórum virtúte sanctórum, iúgiter vita nostra firmétur. Per Christum.
Die 3 ianuarii
(si non fit memoria sanctissimi Nominis Iesu)
Benedíctus qui venit in nómine Dómini : Deus Dóminus et illúxit nobis.
Deus, qui, per beátum sacrae Vírginis partum, Fílii tui carnem humánis fecísti praeiudíciis non tenéri, praesta, quaésumus, ut, huius creatúrae novitáte suscépti, vetustátis antíquae contágiis exuámur. Per Dóminum.
Léctio Epístulae primae beáti Ioánnis apóstoli
Si scitis quóniam Christus iustus est, scitóte quóniam et omnis, qui facit iustítiam, ex ipso natus est.
Vidéte qualem caritátem dedit nobis Pater, ut fílii Dei nominémur, et sumus ! Propter hoc mundus non cognóscit nos, quia non cognóvit eum. Caríssimi, nunc fílii Dei sumus, et nondum manifestátum est quid érimus ; scimus quóniam, cum ipse apparúerit, similes ei érimus, quóniam vidébimus eum, sícuti est.
Et omnis, qui habet spem hanc in eo, puríficat se, sicut ille purus est. Omnis, qui facit peccátum, et iniquitátem facit, quia peccátum est iníquitas. Et scitis quóniam ille appáruit, ut peccáta tólleret, et peccátum in eo non est. Omnis, qui in eo manet, non peccat ; omnis, qui peccat, non vidit eum nec novit eum.
Psalmus
Cantáte Dómino cánticum novum, quia mirabília fecit.
Salvávit sibi déxtera eius, et bráchium sanctum eius.
Vidérunt omnes términi terrae salutáre Dei nostri.
Iubiláte Deo, omnis terra, erúmpite, exsultáte et psállite.
Psállite Dómino in cíthara, in cíthara et voce psalmi ;
In tubis ductílibus et voce tubae córneae, iubiláte in conspéctu regis Dómini.
Allelúia, allelúia.
Verbum caro factum est et habitávit in nobis. Quotquot accepérunt eum, dedit eis potestátem fílios Dei fíeri.
Allelúia.
Léctio sancti Evangélii secundum Ioánnem
Videt Ioánnes Iesum veniéntem ad se et ait : «Ecce agnus Dei, qui tollit peccátum mundi. Hic est, de quo dixi : Post me venit vir, qui ante me factus est, quia prior me erat. Et ego nesciébam eum, sed ut manifestétur Israel, proptérea veni ego in aqua baptízans».
Et testimónium perhíbuit Ioánnes dicens : «Vidi Spíritum descendéntem quasi colúmbam de caelo, et mansit super eum ; et ego nesciébam eum, sed, qui misit me baptizáre in aqua, ille mihi dixit :
“Super quem víderis Spíritum descendéntem et manéntem super eum, hic est qui baptízat in Spíritu Sancto”.
Et ego vidi et testimónium perhíbui quia hic est Fílius Dei».
Múnera, quaésumus, Dómine, tuae plebis propitiátus assúme, ut, quae fídei pietáte profiténtur, sacraméntis caeléstibus apprehéndant. Per Christum.
Vere dignum et iustum est, aequum et salutáre, nos tibi semper et ubíque grátias ágere : Dómine, sancte Pater, omnípotens aetérne Deus : per Christum Dóminum nostrum.
Per quem hódie commércium nostrae reparátiónis effúlsit, quia, dum nostra fragílitas a tuo Verbo suscípitur, humána mortálitas non solum in perpétuum transit honórem, sed nos quoque, mirándo consórtio, reddit aetérnos.
Et ídeo, choris angélicis sociáti, te laudámus in gáudio confiténtes :
Sanctus…
- Propter nímiam caritátem suam, qua diléxit nos Deus, Fílium suum misit in similitúdinem carnis peccáti.
Deus, qui nos sacraménti tui participatióne contíngis, virtútis eius efféctus in nostris córdibus operáre, ut suscipiéndo múneri tuo per ipsum munus aptémur. Per Christum.
Die 4 ianuarii
Pópulus qui ambulábat in ténebris, vidit lucem magnam : habitántibus in regióne umbrae mortis, lux orta est eis.
Concéde nobis, omnípotens Deus, ut salutáre tuum, quod ad redemptiónem mundi luce nova caelórum procéssit, nostris semper innovándis córdibus oriátur. Per Dóminum.
Léctio Epístulae primae beáti Ioánnis apóstoli
Filíoli, nemo vos sedúcat. Qui facit iustítiam, iustus est, sicut ille iustus est ; qui facit peccátum, ex Diábolo est, quóniam a princípio Diábolus peccat. Propter hoc appáruit Fílius Dei, ut dissólvat ópera Diáboli. Omnis, qui natus est ex Deo, peccátum non facit, quóniam semen ipsíus in eo manet ; et non potest peccáre, quóniam ex Deo natus est.
In hoc manifésti sunt fílii Dei et fílii Diáboli : omnis, qui non facit iustítiam, non est ex Deo, et qui non díligit fratrem suum.
Psalmus
Cantáte Dómino cánticum novum, quia mirabília fecit.
Salvávit sibi déxtera eius, et bráchium sanctum eius.
Sonet mare et plenitúdo eius, orbis terrárum et qui hábitant in eo.
Flúmina pláudent manu, simul montes exsultábunt a conspéctu Dómini, quóniam venit iudicáre terram.
Iudicábit orbem terrárum in iustítia et pópulos in aequitáte.
Allelúia, allelúia.
Multifáriam et multis modis olim Deus locútus pátribus in prophétis, in novíssimis his diébus locútus est nobis in Fílio.
Allelúia.
Léctio sancti Evangélii secundum Ioánnem
Iterum stabat Ioánnes et ex discípulis eius duo, et respíciens Iesum ambulántem dicit : «Ecce agnus Dei». Et audiérunt eum duo discípuli loquéntem et secúti sunt Iesum.
Convérsus autem Iesus et videns eos sequéntes se dicit eis :
«Quid quaéritis ?».
Qui dixérunt ei : «Rabbi - quod dícitur interpretátum Magíster - ubi manes ?».
Dicit eis :
«Veníte et vidébitis».
Venérunt ergo et vidérunt, ubi manéret, et apud eum mansérunt die illo ; hora erat quasi décima.
Erat Andréas, frater Simónis Petri, unus ex duóbus, qui audíerant ab Ioánne et secúti fúerant eum. Invénit hic primum fratrem suum Simónem et dicit ei : «Invénimus Messíam» - quod est interpretátum Christus - ; addúxit eum ad Iesum.
Intúitus eum Iesus dixit :
«Tu es Simon fílius Ioánnis ; tu vocáberis Cephas» - quod interpretátur Petrus -.
Deus, auctor sincérae devotiónis et pacis, da, quaésumus, ut et maiestátem tuam conveniénter hoc múnere venerémur, et sacri participatióne mystérii fidéliter sénsibus uniámur. Per Christum.
Vere dignum et iustum est, aequum et salutáre, nos tibi semper et ubíque grátias ágere : Dómine, sancte Pater, omnípotens aetérne Deus : per Christum Dóminum nostrum.
Per quem hódie commércium nostrae reparátiónis effúlsit, quia, dum nostra fragílitas a tuo Verbo suscípitur, humána mortálitas non solum in perpétuum transit honórem, sed nos quoque, mirándo consórtio, reddit aetérnos.
Et ídeo, choris angélicis sociáti, te laudámus in gáudio confiténtes :
Sanctus…
- Vita manifestáta est, quae erat apud Patrem, et appáruit nobis.
Divérsis plebs tua, Dómine, gubernáta subsídiis, et praeséntia pietátis tuae remédia cápiat et futúra, ut, transeúntium rerum necessária consolatióne fovénte, fiduciálius ad aetérna conténdat. Per Christum.
Die 5 ianuarii
In princípio et ante saécula Deus erat Verbum, et ipse nasci dignátus est Salvátor mundi.
Deus, qui pópulo tuo, Unigéniti tui nativitáte, redemptiónis efféctum mirabíliter inchoásti, ita, quaésumus, fídei fámulis tuis tríbue firmitátem, ut usque ad promíssum glóriae praémium, ipso gubernánte, pervéniant. Per Dóminum.
Léctio Epístulae primae beáti Ioánnis apóstoli
Haec est annuntiátio, quam audístis ab inítio, ut diligámus altérutrum. Non sicut Cain : ex malígno erat et occídit fratrem suum. Et propter quid occídit eum ? Quóniam ópera eius malígna erant, fratris autem eius iusta.
Nolíte mirári, fratres, si odit vos mundus. Nos scimus quóniam transívimus de morte in vitam, quóniam dilígimus fratres ; qui non díligit, manet in morte. Omnis, qui odit fratrem suum, homicída est, et scitis quóniam omnis homicída non habet vitam aetérnam in semetípso manéntem.
In hoc nóvimus caritátem, quóniam ille pro nobis ánimam suam pósuit ; et nos debémus pro frátribus ánimas pónere. Qui habúerit substántiam mundi et víderit fratrem suum necésse habére et cláuserit víscera sua ab eo, quómodo cáritas Dei manet in eo ? Filíoli, non diligámus verbo nec lingua sed in ópere et veritáte. In hoc cognoscémus quóniam ex veritáte sumus, et in conspéctu eius placábimus corda nostra, quóniam si reprehénderit nos cor, maior est Deus corde nostro et cognóscit ómnia.
Caríssimi, si cor nostrum non reprehénderit nos, fidúciam habémus ad Deum.
Psalmus
Iubiláte Dómino, omnis terra, servíte Dómino in laetítia ;
Introíte in conspéctu eius in exsultatióne.
Scitóte quóniam Dóminus ipse est Deus ; ipse fecit nos, et ipsíus sumus, pópulus eius et oves páscuae eius.
Introíte portas eius in confessióne, átria eius in hymnis, confitémini illi, benedícite nómini eius.
Quóniam suávis est Dóminus ; in aetérnum misericórdia eius, et usque in generatiónem et generatiónem véritas eius.
Allelúia, allelúia.
Dies sanctificátus illúxit nobis : veníte, gentes, et adoráte Dóminum ; quia hódie descéndit lux magna super terram.
Allelúia.
Léctio sancti Evangélii secundum Ioánnem
Vóluit Iesus exíre in Galilaéam et invénit Philíppum. Et dicit ei Iesus :
«Séquere me».
Erat autem Philíppus a Bethsáida, civitáte Andréae et Petri. Invénit Philíppus Nathánael et dicit ei : «Quem scripsit Móyses in Lege et Prophétae invénimus, Iesum fílium Ioseph a Názareth». Et dixit ei Nathánael : «A Názareth potest áliquid boni esse ?». Dicit ei Philíppus : «Veni et vide».
Vidit Iesus Nathánael veniéntem ad se et dicit de eo :
«Ecce vere Israelíta, in quo dolus non est».
Dicit ei Nathánael : «Unde me nosti?».
Respóndit Iesus et dixit ei :
«Priúsquam te Philíppus vocáret, cum esses sub ficu, vidi te».
Respóndit ei Nathánael : «Rabbi, tu es Fílius Dei, tu rex es Israel !».
Respóndit Iesus et dixit ei :
«Quia dixi tibi : Vidi te sub ficu, credis ? Maiora his vidébis».
Et dicit ei :
«Amen, amen dico vobis :
Vidébitis caelum apértum et angelos Dei ascendéntes et descendéntes supra Fílium hóminis».
Súscipe, Dómine, múnera nostra, quibus exercéntur commércia gloriósa, ut, offeréntes quae dedísti, teípsum mereámur accípere. Per Christum.
Vere dignum et iustum est, aequum et salutáre, nos tibi semper et ubíque grátias ágere : Dómine, sancte Pater, omnípotens aetérne Deus : per Christum Dóminum nostrum.
Per quem hódie commércium nostrae reparátiónis effúlsit, quia, dum nostra fragílitas a tuo Verbo suscípitur, humána mortálitas non solum in perpétuum transit honórem, sed nos quoque, mirándo consórtio, reddit aetérnos.
Et ídeo, choris angélicis sociáti, te laudámus in gáudio confiténtes :
Sanctus…
- Sic Deus diléxit mundum, ut Fílium suum unigénitum daret, ut omnis, qui credit in eum, non péreat, sed hábeat vitam aetérnam.
Da, quaésumus, omnípotens Deus, ut mysteriórum virtúte sanctórum iúgiter vita nostra firmétur. Per Christum.